Golwg ar y cwrs Cymreig sy'n datblygu hyfforddwyr pêl-droed gorau'r byd

Mae Nuri Sahin wedi ennill teitlau cynghrair yn Sbaen a'r Almaen fel chwaraewr ac mae eisoes wedi rheoli yng Nghynghrair y Pencampwyr

Mae rhai o enwau mwyaf y byd pêl-droed wedi cael eu denu ar gwrs hyfforddi gan Gymdeithas Bêl-droed Cymru yng Nghasnewydd - cwrs sy'n eu paratoi i reoli ar y lefel uchaf.

Yng ngwesty'r Celtic Manor, mae Cymdeithas Bêl-droed Cymru yn cynnal cwrs cymhwyster hyfforddi uchaf y gamp, sef Trwydded Broffesiynol UEFA.

Ymhlith y rhestr o raddedigion y cwrs mae Thierry Henry, Yaya Toure, Roberto Martinez a Mikel Arteta.

Mae'r criw presennol yr un mor amrywiol - o gyn-chwaraewr canol cae Borussia Dortmund a Lerpwl, Nuri Sahin, i reolwr Cymru, Rhian Wilkinson ac o reolwr tref Caernarfon, Richard Davies, i'w ffrind newydd, capten Nice a chwaraewr rhyngwladol Brasil, Dante.

Wedi'i daflu at ei gilydd ddwy flynedd yn ôl mae'r grŵp hwn bellach yn "teimlo fel teulu", meddai Dante.

Ar ôl cwblhau eu trwyddedau B ac A, mae dosbarth 2025 yn cyrraedd camau olaf eu trwydded broffesiynol ac yn barod i gymryd y cam nesaf yn eu gyrfa hyfforddi.

Mae Dafydd Pritchard o BBC Chwaraeon wedi llwyddo i gael cipolwg prin ac unigryw y tu ôl i'r llenni ar y cwrs y mae Sahin yn ei ddisgrifio fel "yr Harvard ar gyfer hyfforddi".

'Wedi dysgu cymaint'

Ar ôl chwarae a rheoli yng Nghynghrair y Pencampwyr gyda thimau fel Real Madrid a Dortmund, mae cyn-chwaraewr rhyngwladol Twrci, Sahin, yn teimlo'n gartrefol mewn amgylchedd pêl-droed elitaidd.

Mae ganddo hefyd brofiad o sefydliadau addysgol blaenllaw yn y byd, ar ôl astudio rheolaeth chwaraeon yn Ysgol Fusnes Harvard.

Felly pan fydd Sahin yn asesu cwrs Trwydded Broffesiynol Cymdeithas Bêl-droed Cymru mae'n dod o le o awdurdod.

"Rydw i wedi dysgu cymaint," meddai. "Bydd hyn yn fy mharatoi nid yn unig ar gyfer fy ngyrfa hyfforddi ond gweddill fy oes.

"Cefais hyn pan oeddwn i yn Harvard, ac mae hyn fel Harvard ar gyfer hyfforddi.

"Rydw i wedi mwynhau pob munud ar y cwrs hwn, gyda'r bobl hyn. Mae'n teimlo'n arbennig yma.

"Rydyn ni wedi creu cwlwm clos ac rydw i'n gwybod y byddwn ni'n grŵp a fydd wedi'i gysylltu am weddill ein hoes."

Jonathan Walters (chwith), Brandi Chastain (ail o'r chwith), Gael Clichy (ail o'r dde) ac Andy King yn mynd i'r afael â thasg VR

Mae hwn yn gwrs dwys, sy'n gofyn i ymgeiswyr ymrwymo i oriau hir, gartref – a allai fod yn unrhyw le yn y byd – ac yn ystod eu cyfnodau cyswllt â Chymdeithas Bêl-droed Cymru.

Yn ystod y penwythnos estynedig hwn ym mis Mai, mae'n ofynnol iddynt wneud profion ymarferol a sesiynau hyfforddi ar y cae ym Mharc y Ddraig yng Nghasnewydd, tra bod gwaith yn y Celtic Manor gerllaw yn cynnwys y seminarau realiti rhithwir, tasgau damcaniaeth tactegol a chyflwyniadau unigol.

Clichy yn dysgu 'sut i ymdopi â phwysau'

Er bod y wybodaeth bêl-droed sydd ei hangen yn helaeth – a'r manylion technegol yn fanwl – mae ymgeiswyr yn aml yn cael eu tynnu allan o'u lle cysurus ar y cwrs hwn.

"Aethom i weithio gyda'r fyddin am dri diwrnod lle gwnaethon nhw ein hamddifadu o gwsg ac roedd yn rhaid i ni wneud tasgau tra'n flinedig iawn," meddai Clichy, aelod o Invincibles Arsenal yn 2004.

"Roedd y bwyd a gawson ni mewn dognau bach iawn ac rydych chi'n sylweddoli eich bod chi'n cael eich effeithio gan hyn.

"Fe allech chi fod mewn gêm bwysig iawn, rydych chi'n colli 2-0, roedd gennych chi gynllun yn ystod yr wythnos gyfan ac yna rydych chi'n canfod eich hun ar ei hôl hi, sut ydych chi'n ymdopi â hyn?

"Felly roedd hynny'n ffordd wahanol i ni ddysgu sut i ymdopi â phwysau."

Cyn-gefnwr chwith Manchester City, Gael Clichy, yw hyfforddwr cynorthwyol Ffrainc dan-21 bellach.

Rhannu torcalon a ffurfio cyfeillgarwch

P'un a ydych chi eisoes wedi chwarae ar y lefel uchaf, neu wedi rheoli timau lled-broffesiynol, mae 'na deimlad trawiadol o gydraddoldeb yma.

"Mae pobl yn hoffi clywed straeon am Pep [Guardiola] ac Arsene Wenger ond rwy'n anelu at fod yn hyfforddwr o'r radd uchaf," meddai Clichy.

"Dwi'n gwybod y bydd yn rhaid i mi ddechrau ar y gwaelod a gall y bobl hyn ddweud wrtha i sut mae hi."

Yn ymarferol, o safbwynt pêl-droed, mae yna wersi gwerthfawr y gall y bobl hyn eu dysgu oddi wrth ei gilydd, ond hefyd ar lefel mwy dynol.

"Roedd yn rhaid i ni wneud cyflwyniad o amgylch pedwar peth - eich hanes, eich torcalon, eich arwyr a'ch gobeithion," meddai Adie Harvey, sy'n hyfforddi tîm dan 16 Cymru.

"Roedd yn rhaid i bawb gyflwyno hynny i'r grŵp, a oedd yn eithaf brawychus mewn gwirionedd, gyda lefel arbenigedd pobl yn y grŵp.

"Ond fe wnaeth hynny gael gwared ag unrhyw hierarchaeth neu ego ymhlith y grŵp."

"Rydyn ni i gyd wedi bod trwy ryw fath o drasiedi neu dorcalon, felly fe wnaeth hynny gysylltu pob un ohonom ni'n fawr a rhoi cymaint o nerth i ni fel carfan."

Mae Dante (canol) a Richard Davies (dde) yn gweithio ar dasg dactegol gyda chyn-chwaraewr canol cae Cymru a Leicester, Andy King (chwith).

Y canlyniad yw bod y rhain yn fwy na pherthnasoedd gwaith yn unig, ond yn gyfeillgarwch go iawn.

"Mae'n teimlo fel teulu, felly byddwn yn sicr o gadw mewn cysylltiad," meddai Davies, hyfforddwr tîm Caernarfon sy'n dîm lled-broffesiynol yn Uwch Gynghrair Cymru.

"Ydyn, mi rydym fel teulu," cytunodd Dante.

"Mae Richard yn angerddol. Roeddwn i wedi fy synnu i weld yr emosiwn y mae'n siarad ag ef, ac rwy'n credu bod angen yr emosiwn hwn y tu mewn i bob hyfforddwr."

Wrth sefyll wrth ymyl cyn-amddiffynnwr Bayern Munich, ychwanegodd Davies: "I mi, mae cymaint o wybodaeth gan Dante.

"Rydym yn siarad am rywun sy'n rheoli yn Uwch Gynghrair Cymru, yn gweithio gyda rhywun sydd wedi chwarae yng Nghynghrair y Pencampwyr a Chwpan y Byd.

"Heb y cwrs hwn, fyddwn i byth yn dod ar draws pobl fel Dante."

Rhian Wilkinson fydd yn arwain Cymru yn eu twrnamaint mawr cyntaf i fenywod yr haf hwn

Er bod y rhan fwyaf yma newydd ddechrau ar eu teithiau hyfforddi, mae eraill eisoes yn rheolwyr llawn.

Mae un o'r rheini, pennaeth tîm merched Cymru, Rhian Wilkinson, yn jyglo ei hastudiaethau â pharatoadau ar gyfer yr Ewros yr haf hwn.

"Mae'n lot ond dydw i byth eisiau colli'r rhain. Dydych chi byth yn rhoi'r gorau i ddysgu," meddai Wilkinson.

"Mae hwn yn amgylchedd lle mae dynion gorau'r gêm eisiau dod i ddysgu ond yn yr un modd mae'n rhaid i hyn fod yn rhywbeth rydyn ni'n dechrau edrych arno'n fwy difrifol gyda'r menywod. Mae hwn yn gam gwych i gêm y menywod.

"Mae hon yn gamp a gyrfa sy'n cael ei rheoli'n fawr gan ddynion.

"Mae'n rhan o fy swydd i wneud yn siŵr fy mod i'n parhau i geisio creu llwybr neu ddangos enghreifftiau o fenywod a all gael gyrfa yn y gêm. A dim ond oherwydd menywod fel Brandi Chastain, a wnaeth hynny o'm blaen i, y gallaf wneud hynny."

Gyda dau Gwpan y Byd a dwy fedal aur Olympaidd i'w henw, mae Chastain, sydd yn gyn-chwaraewr rhyngwladol o'r Unol Daleithiau ac wedi ennill 192 o gapiau i'w gwlad, yn un o'r wynebau mwyaf adnabyddus yng ngêm y menywod.

Yn ogystal â thraddodi araith yng Nghynhadledd Hyfforddi Genedlaethol Cymdeithas Bêl-droed Cymru, mae Chastain yn cymryd rhan gyda'r rhai ar y cwrs.

"Rydw i wedi bod yn y byd pêl-droed ers 50 mlynedd ac rydw i'n gwybod am y gwersi a'r hyfforddiant mae merched a menywod ifanc yn eu derbyn," meddai.

"Mae ... chwaraeon yn caniatáu i ferched ifanc ddod o hyd i'w llais a'u pŵer a'u potensial, ac rydyn ni'n gwybod bod merched ifanc sy'n cymryd rhan mewn chwaraeon yn dod yn fenywod sy'n arwain."

Brandi Chastain (ail o'r chwith) sgoriodd y gic fuddugol o'r smotyn i'r UDA yn eu gêm yn erbynTsieina yn rownd derfynol Cwpan y Byd 1999

Mae siaradwyr gwadd eraill yn y gynhadledd yn cynnwys prif hyfforddwr tîm dynion Cymru, Craig Bellamy, a rheolwr newydd y Rangers, Russell Martin, sy'n cyflwyno eu hathroniaethau pêl-droed i neuadd orlawn o gannoedd yn y Celtic Manor.

"Dyma fy mywyd i," meddai Bellamy. "Mae'r gêm hon yn eich cysylltu â chymaint o bobl ac rwyf bob amser yn agored i safbwyntiau gan bawb."

"Allwch chi siarad ag angerdd? Roeddwn i'n lwcus bod gen i reolwr fel Syr Bobby Robson a roddodd hynny i mi.

"Fe ges i brofiad o chwarae o dan lawer o reolwyr, da a drwg, ac fe wnes i geisio dysgu o'r da a'r drwg, a myfyrio arnaf fy hun."

400 o ymgeiswyr am 20 lle

Y dyn sy'n goruchwylio'r cwrs yw prif swyddog pêl-droed yr FAW, Dave Adams, sydd hefyd yn gyfrifol am gêm y dynion a'r menywod ar bob lefel yng Nghymru.

Penododd y ddau brif hyfforddwyr y tîm cenedlaethol y llynedd ac, ar ben ei waith o ddatblygu pêl-droed Cymru, mae'n arwain y cwrs Trwydded Broffesiynol.

"Rydym yn cael bron i 400 o ymgeiswyr am 20 lle bob dwy flynedd. Mae'n gystadleuol iawn," meddai Adams.

"Mae'n rhaid i ni geisio cefnogi ein hyfforddwyr Cymreig fel Chris Gunter a phobl sy'n gweithio i'n cymdeithas genedlaethol, ond yn yr un modd, rydym yn cydnabod, trwy gael pobl fel Nuri Sahin a Mikel Arteta, Chris Wilder, Roberto Martinez, Steve Cooper cyn hynny - mae'r enwau'n helaeth - eu bod yn dod â lens wahanol.

"Maen nhw wedi hyfforddi a gweithio ar y lefel uchaf.

"Mae cydnabyddiaeth ar ein hochr ni, pan rydyn ni'n dod â phobl fel 'na ac mae hynny'n ein helpu ni i dyfu'r gymdeithas."

Breuddwydio'n fawr

Wrth wraidd holl waith Cymdeithas Bêl-droed Cymru mae'r cysyniad o'r ffordd Gymreig - ethos sy'n sail i bopeth o'r lefel elitaidd i lawr gwlad, gweledigaeth ar gyfer pêl-droed yng Nghymru, sut i ddatblygu'r gêm a meithrin y synnwyr o falchder cenedlaethol.

"Dyma ein mantra ni, Gyda'n Gilydd yn Gryfach," ychwanega Adams.

"P'un a ydych chi'n brif hyfforddwr neu'n tylunio neu'n gogydd, mae gennych chi i gyd ran hanfodol i'w chwarae ac mae'n rhaid i chi fod yn rhan o weledigaeth y prif hyfforddwr."

"Mae'n bwysig bod gennym ni'r mantra hwnnw ac mae'n gyrru popeth rydyn ni'n ei wneud.

"Pam ddylen ni freuddwydio'n fach? Breuddwydio'n fawr. Rydyn ni'n wlad fach ond mae gennym ni dalent anhygoel."