Premiwm treth cyngor ar ail dai Sir Ddinbych i godi i 150%

Bydd y premiwm treth cyngor ar gyfer ail gartrefi ac eiddo gwag hirdymor yn cynyddu i 150% yn Sir Ddinbych ym mis Ebrill 2025

Mae cabinet Cyngor Sir Ddinbych wedi cymeradwyo cynlluniau i godi premiwm treth cyngor o 150% ar berchnogion ail dai a thai gwag hirdymor.

Mae perchnogion o'r fath eisoes yn talu 100% yn fwy na'r gyfradd treth cyngor arferol ers mis Ebrill 2024, yn dilyn penderfyniad ym Medi 2023.

Bryd hynny hefyd penderfynwyd y byddai’r premiwm yn cynyddu i 150% yn Ebrill 2025.

Mae premiwm ychwanegol o 50% ar gyfer cartrefi sydd wedi bod yn wag a heb ddodrefn ers pum mlynedd neu fwy.

Dydd Mawrth fe wnaeth aelodau'r cabinet gymeradwyo'r polisi ar gyfer Ebrill 2025 yn unfrydol, a chytuno i'w adolygu ar gyfer 2026/27.

'Hyrwyddo cymunedau cynaliadwy'

Yn y cyfarfod dywedodd yr Aelod Cabinet dros Dai, y Cynghorydd Gwyneth Ellis, mai'r "pwrpas yw cynyddu’r tai fforddiadwy yn Sir Ddinbych er mwyn hyrwyddo cymunedau cynaliadwy".

"Dyna’r elfen bwysig.”

Mae Llywodraeth Cymru yn caniatáu i gynghorau godi hyd at 300% o bremiwm ar ail gartrefi a thai gwag, ond clywodd cynghorwyr fod eithriadau ar gael.

Mae sawl cyngor wedi cyflwyno premiwm o'r fath, ond yn ddiweddar fe wnaeth cynghorwyr Sir Benfro bleidleisio i'w leihau o 200% i 150%, dim ond chwe mis ar ôl cyflwyno'r gyfradd uwch.