Carcharu tri dyn am herwgipio yng Ngheredigion

Cafodd Mohammad Comrie, Faiz Shah ac Elijah Ogunnubi-Sime ddedfrydau o dros wyth mlynedd yr un

Mae tri dyn wedi cael dedfrydau o dros wyth mlynedd yr un dan glo ar ôl herwgipio cynhyrchydd cerddoriaeth Israelaidd yng Ngheredigion.

Clywodd Llys y Goron Abertawe fod y cynllwyn i herwgipio Itay Kashti wedi'i ysgogi gan resymau gwleidyddol a chrefyddol, yn ogystal ag er budd ariannol.

Roedd Mohammad Comrie, 23 o Leeds, Faiz Shah, 23 o Bradford, ac Elijah Ogunnubi-Sime, 20 o Wallington, wedi creu rhestr siopa o eitemau ar gyfer yr herwgipio, gan gynnwys mygydau a chyffion.

Yn wreiddiol roedd y tri wedi pledio'n ddieuog i herwgipio a chyhuddiadau o anafu'n fwriadol ac anafu'n anghyfreithlon.

Ar ddiwrnod cyntaf yr achos llys fis diwethaf fe newidiodd y tri eu ple gan bledio'n euog i herwgipio.

Cafodd Comrie a Shah eu dedfrydu ddydd Gwener i wyth mlynedd a mis yr un yn y carchar, tra bydd Ogunnubi-Sime yn treulio'r un cyfnod mewn sefydliad troseddwyr ifanc.

Roedd y tri dyn wedi denu'r cynhyrchydd cerddoriaeth i fwthyn yng Ngheredigion

Ar 14 Awst 2024, derbyniodd Mr Kashti neges gan ddyn o'r enw Lucas Winslow oedd yn honni ei fod yn gweithio i Polydor Records - cwmni cynhyrchu a recordio cerddoriaeth.

Roedd y negeseuon wedi cael eu hanfon gan y tri dyn.

Cafodd Mr Kashti ei wahodd ganddo i fynychu gwersyll recordio cerddoriaeth yng Nghymru ar 26 Awst.

Fe deithiodd Mr Kashti i'r lleoliad felly o dan yr argraff ei fod yn mynd i ddigwyddiad recordio cerddoriaeth dilys.

Dyma ddechrau ar gynllwyn "gofalus a chywrain" y tri, clywodd y llys.

Roedd y tri diffynnydd wedi sefydlu grŵp negeseua ar ap Telegram, lle wnaethon nhw drafod sawl elfen o'u cynllun mewn manylder, gan gynnwys rhestr siopa o eitemau oedd eu hangen i herwgipio Mr Kashti.

Roedd y rhestr yn cynnwys mygydau wyneb, menyg, ceir rhent, mwgwd llygaid a llety addas i'w logi - gyda'r eitemau yn cael eu ticio oddi ar y rhestr wrth iddyn nhw gael gafael ynddynt.

Cafwyd trafodaeth hefyd ai cyffion neu zip ties fyddai fwyaf effeithiol. Aeth y ddau beth gyda nhw i'r safle.

Yn hwyrach yn y broses gynllwynio, fe geisiodd y tri i gael gafael mewn ketamine hefyd er mwyn rhoi'r cyffur i Mr Kashti.

Dau gymhelliad tebygol

Clywodd y llys bod dau gymhelliad i'r cynllwyn.

Roedd yna gymhelliad ariannol, gyda sôn sut bydden nhw'n gwyngalchu'r arian yr oedden nhw am orfodi'r dioddefwr i roi iddynt.

Roedd yna gymhelliad gwleidyddol a chrefyddol y tu ôl i dargedu Mr Kashti hefyd, am ei fod yn dod o Israel.

Dan enw a manylion banc oedd wedi eu dwyn, cafodd eiddo'r 'Gatehouse' ym Mryn-teg yng Ngheredigion, ger Llanybydder, ei logi gan y tri.

Dywedodd yr erlynydd Craig Jones eu bod wedi ymchwilio i'r lleoliad "yn fanwl", gyda neges gan un ohonynt yn dweud: "Anywhere in Wales is calm, bro."

Heddlu yn yr ardal ar ôl y digwyddiad ddydd Llun, Awst 26

Cafodd tacsi ei drefnu ganddynt hefyd i gasglu Mr Kashti o'i gartref yn Llundain, wnaeth ei gludo i'r bwthyn ym Mryn-teg, ar 26 Awst.

Clywodd y llys fod y gyrrwr tacsi yn gwbl ddiniwed, a - fel Mr Kashti - ddim yn adnabod y tri diffynnydd.

Pan aeth Mr Kashti a'r gyrrwr tacsi, Mohammad Amowar i'r tŷ y prynhawn hwnnw, fe ymosodwyd ar y ddau.

Er iddo gael ei daro yn ei wyneb, llwyddodd y gyrrwr tacsi, Mr Amowar, i ddianc drwy'r drws ffrynt yn syth.

Ni lwyddodd Mr Kashti i ddianc. Cafodd ei ddal gan y tri ac ymosodwyd arno.

Llwyddo i ddianc

Clywodd y llys bod Comrie, Shah ac Ogunnubi-Sime wedi mynd â Mr Kashti a'i roi mewn cyffion yn sownd i reiddiadur yn un o'r ystafelloedd, gan fygwth ei ladd pe bai'n dianc.

Roedd y tri yn gwisgo mygydau i guddio eu hwynebau.

Yn ystod yr ymosodiad, derbyniodd Mr Kashti anafiadau i'w wyneb a'i ben.

Pan adawodd y tri yr ystafell, sylwodd Mr Kashti ei fod wedi cael ei roi mewn cyffion yn sownd i ryw fath o biben neu bolyn - llwyddodd i ddianc drwy godi ei ddwylo i fyny, gan ryddhau ei hun o'r lleoliad a rhedeg allan o'r bwthyn.

Yn gwaedu o'i wyneb a'n parhau mewn cyffion, cuddiodd Mr Kashti mewn llwyni a ffonio ei wraig.

Llwyddodd hi i gysylltu gyda'r heddlu ar ei ran, ac oedd y gyrrwr tacsi hefyd wedi cysylltu â'r heddlu.

Dihangodd Comrie, Shah ac Ogunnubi-Sime o'r lleoliad, ond daeth yr heddlu o hyd iddyn nhw yr un noson mewn caeau cyfagos ar ôl i hofrennydd gael ei ddefnyddio i chwilio amdanynt.

Cafodd Mr Kashti ei gludo i'r ysbyty gyda mân anafiadau.

Roedd Bryn-teg yn llawn plismyn wedi'r digwyddiad, medd Gillian Davies

Mae Gillian Davies yn byw ym Mryn-teg. Dywedodd fod heddlu'n drwch yn yr ardal wedi'r digwyddiad.

"Dod nôl adref yn hwyr y prynhawn nes i, a'r gŵr yn dweud bod tipyn o helynt wedi bod 'mlan 'ma," meddai.

"Tipyn o gerbydau heddlu, ceir, faniau a wedyn fe ddaeth hofrennydd.

"Yn amlwg, roedden nhw'n chwilio am rywun, neu fwy nag un person.

"Do'n i ddim yn siŵr ar y pryd beth oedd yn mynd ymlaen."

Wrth i ragor o fanylion ddod i'r amlwg yn yr achos llys am yr hyn oedd wedi digwydd mewn bwthyn gerllaw, dywedodd: "I ddweud y gwir, ni gyd mewn sioc.

"Mae Bryn-teg yn le bach diarffordd. Does dim byd yn digwydd yma.

"Ni'n glwstwr o dai ac un capel bach. Mae e'n lecyn bach tawel iawn.

"I glywed bod y bobl hyn wedi dod lawr ac ymosod ar y person yma, mae e'n codi sioc ac ofn arnoch chi i feddwl bod rhywbeth yn digwydd yn eich cymuned chi - mor arswydus o beth."

'Ei dargedu oherwydd ei dras Iddewig'

Yn dedfrydu'r tri, dywedodd y Barnwr Catherine yn Llys y Goron Abertawe bod "lefel y paratoi yn amlwg", a'u bod wedi cael eu "cymell gan ddigwyddiadau rhywle arall yn y byd".

"Does gen i ddim amheuaeth bod Mr Kashti wedi cael ei dargedu oherwydd ei dras Iddewig," meddai.

Cafodd gorchymyn atal - restraining order - ei gyflwyno hefyd, sy'n eu gwahardd rhag cysylltu â'r dioddefwr am 15 mlynedd.

Dywedodd Michael Cray o Wasanaeth Erlyn y Goron: "Roedd y diffynwyr wedi cynllunio'r drosedd yn fanwl, ac wedi trafod beth oedden nhw am ei wneud, sut yr oedden nhw am ei chyflawni, a sut oedden nhw am ddianc gyda'r arian.

"Yn ffodus iawn, ni wnaethant lwyddo i gyflawni'r troseddau er gwaetha'r cynllunio manwl.

"Mae'n rhaid bod hyn wedi bod yn brofiad gwirioneddol ofnus i'r ddau ddioddefwr a oedd heb syniad mai trap oedd y cyfan.

"Hoffwn ddiolch iddynt am gefnogi'r erlyniad hwn, ac rydym ni'n gobeithio y bydd y ffaith bod y troseddwyr hyn wedi cael eu dwyn gerbron y llys yn eu helpu nhw i symud ymlaen gyda'u bywydau."