Carcharu dau am lofruddio dyn 33 oed tu allan i westy

Bydd Joseph Dix (chwith) a Macauley Ruddock yn treulio o leiaf 13 mlynedd yn y carchar

Mae dau ddyn wedi cael eu carcharu am lofruddio dyn 33 oed yn Abertawe y llynedd.

Bu farw Andrew Main, o Falkirk yn yr Alban, bedair wythnos ar ôl ymosodiad ger mynedfa'r Travelodge ar Ffordd y Dywysoges am tua 02:00 ar 17 Gorffennaf.

Cafwyd Joseph Dix, 26 oed o Frome, a Macauley Ruddock, 27 oed o Gaerfaddon, yn euog o lofruddiaeth yn Llys y Goron Abertawe.

Bydd y ddau yn treulio o leiaf 13 mlynedd a 176 diwrnod yn y carchar.

Bu farw Andrew Main bedair wythnos ar ôl yr ymosodiad yn Abertawe ym mis Gorffennaf

Dywedodd y ditectif arolygydd Claire Lamerton o Heddlu'r De fod Dix a Ruddock yn ymweld ag Abertawe oherwydd eu gwaith, a'u bod wedi cwrdd â Mr Main am y tro cyntaf mewn tafarn yn agos i'w gwesty.

"Yn hwyrach y noson honno fe ddechreuodd ffrae rhwng Joseph Dix a Macauley Ruddock ac Andrew Main a'i ffrind," meddai Ms Lamerton.

Fe ddigwyddodd yr ymosodiad ger mynedfa'r Travelodge ar Ffordd y Dywysoges

"Fe symudodd y ffrae yma o'r gwesty i'r stryd cyn i Dix a Ruddock erlid Mr Main a'i daro yn anymwybodol mewn ymosodiad parhaus.

"Er bod pob un oedd yn rhan o'r digwyddiad wedi yfed alcohol y noson honno, does dim esgus am lefel y trais... yn amlwg roedden nhw wedi bwriadu achosi niwed i'r dioddefwr, a nawr fe fydd y ddau yn wynebu cyfnod sylweddol yn y carchar o ganlyniad i hynny."