Crìonadh-sluaigh sna h-Eileanan an Iar "aig ìre far am feumar taic nàiseanta"

Thuirt NHS nan Eilean Siar roimhe gu bheil 1,500 teaghlach ùr a dhìth airson dèiligeadh ri buaidh chrìonadh-sluaigh sna h-Eileanan an Iar

Dh'iarr Àrd-oifigear NHS nan Eilean Siar air Riaghaltas na h-Alba gun dèan iad barrachd airson dèiligeadh ri crìonadh-sluaigh, agus dùil ri lùghdachadh 6% san àireimh dhaoine aig aois obrach san ath thrì bliadhna.

Chan e seo a' chiad turas a tha Gòrdan Jamieson air draghan a nochdadh mun bhuaidh a th' aig dìth luchd-obrach air seirbheisean slàinte eadar Bhatarsaigh agus Leòdhas.

Thuirt e roimhe gu bheil feum ann airson co-dhiù 1,500 teaghlach ùr san sgìre airson dèiligeadh ceart ri buaidh chrìonadh an t-sluaigh.

Tha e ag ràdh gum bi iad a' feuchainn ri sgilean an luchd-obrach a th' aca mar thà a leasachadh ach "gum feum iad daoine a thig chun na sgìre a bhios ag obair còmhla riutha airson seirbheisean a chumail seasmhach agus sàbhailte".

Thàinig Lexa Mlenga a Bheinn na Faoghla à Malawi an dèidh obair mar neach-cùraim fhaighinn

Am measg na fhuair obair slàinte sna h-Eileanan tha Lexa Mlenga a ghluais à Malawi gu Beinn na Faoghla ann an 2023.

An dèidh tòrr obrach rianachd fhuair a cuid chloinne cead a bhith còmhla rithe na dachaigh ùr san Dàmhair.

Thuirt i: "Bu mhath leam fuireach agus obair an seo.

"Chòrdadh e rium glan fuireach ùine mhòr oir bha mi ag obair fad fichead bliadhna mar nurs san àite às an tàinig mi, agus chòrdadh e rium fichead bliadhna eile a dhèanamh mar neach-cùraim an seo nan robh an cothrom sin agam."

Às aonais luchd-obrach sgileil mar Lexa tha dragh air NHS nan Eilean Siar mu sheirbheisean slàinte san àm ri teachd.

Chan e a-mhàin gu bheil an àireamh eileanach a dh'fhaodadh iad fastadh air a dhol sìos, tha àrdachadh air tighinn air na tha de dhaoine a dh'fhaodadh a bhith feumach air seirbhisean slàinte agus cùram sòisealta.

Tha na figearan a' sealltainn gu bheil cha mhòr 25% de luchd-còmhnaidh nan Eilean Sair seachad air 65 bliadhna de dh'aois.

'S ann sna h-Eileanan a bha an crìonadh as motha an Alba san àireamh luchd-còmhnaidh a rèir a' Chunntais-Shluaigh mu dheireadh.

Ann an 2022 bha 26,140 duine a' fuireach san sgìre, lùghdachadh 5.5% bhon chunntas ann an 2011.

Tha cha mhòr a dhà uimhir de dhaoine a' bàsachadh gach bliadhna san sgìre an taca ri na tha a' tighinn dhan t-saoghal.

Tha Christina Mhoireasdan den bheachd gun robh còir ro-innleachd chrìonadh-sluaigh a bhith ann bho chionn ùine mhòir

Thòisich iomairt an Uibhist ann an 2022 airson cur ri àireamh an t-sluaigh.

Gu ruige seo fhuair 25 duine is teaghlaichean taic a thighinn a dh'fhuireach ann, ach chan e obair fhurasta a th' ann.

Mhìnich an t-Oifigear Tuineachaidh, Christina Mhoireasdan: "'S e taigheadas, siubhal is cùram chloinne na trì rudan as motha a bhios a' nochdadh ceann agus tha iad air daoine a chur dheth bho bhith a' tighinn a-nall.

"Bidh sinn a' bruidhinn ri daoine air an deach obair a thabhann agus nuair a thig e gu bhith a' faighinn na taic a dh'fheumas iad airson an obair a ghabhail, tha iad ag aithneachadh gum bi e nas duilghe na shaoileadh iad agus bidh iad a' co-dhùnadh fuireach far a bheil iad."

Bha còir, tha i ag argamaid, gum biodhte mothachail bho chionn ùine mhòir do na dùbhlain a dh'fhaodadh a bhith ann a thaobh na bhiodh a dhìth de dhaoine airson coimhearsnachdan a chumail seasmhach agus plana a leasachadh dha rèir.

Tha cruaidh-fheum air daoine a chumas seirbheisean "seasmhach agus sàbhailte", a rèir Àrd-oifigear NHS nan Eilean Siar

Tha plana nàiseanta a dhìth airson barrachd dhaoine a thàladh chun na sgìre agus am brosnachadh, cho math ri eileanaich fhèin, fuireach ann am beachd ceannard NHS nan Eilean Siar.

Thuirt Gòrdan Jamieson: "Tha mi a' smaoineachadh gu bheil gach buidheann ag obair còmhla ach tha mi a' smaoineachadh gu bheil e air ìre a ruighinn far am feum an Riaghaltas gnothach a ghabhail ris."

Ann am brath, thuirt Rùnaire nan Cùisean Dùthchail, Màiri Gougeon, gum bi Plàna Nàiseanta ùr nan Eilean a' toirt prìomhachais gu bhith a' cumail agus a' tàladh dhaoine, agus gum bi geallaidhean na chois a thaobh taigheadais, cheanglaichean còmhdhail, slàinte agus foghlaim.