"Cosg airgead na h-oighreachd air a' chaisteal, an taigh-tasgaidh sna gàrraidhean"

Tha iarrtas ann gun deadh airgead sam bith a thig bho bhith a' reic Oighreachd Chlann Dòmhnaill ann an Slèite a chosg air Caisteal Armadail, agus an taigh-tasgaidh sna gàrraidhean a tha na chois.

Bha Aonghas Dòmhnallach, ball pàrlamaid na sgìre ann an Westminster, a' bruidhinn agus beachd ann an ceann an deas an Eilein Sgitheanaich gur e faochadh a bhiodh ann faighinn caoidhteas Urras Chlann Dòmhnaill mar uachdaran na h-oighreachd.

Chuir an t-urras an oighreachd, anns a bheil 19,200 acair, air a' mhargaidh airson £6,750,000 sa Mhàirt.

Thèid an caisteal (seann chaisteal a' chinn-fheadhna), an taigh-tasgaidh agus na gàrraidhean a reic fa leth bhon chòrr dhen oighreachd agus tha dùil gun tèid sin air a' mhargaidh as t-samhradh.

Thogar fianais taobh a-muigh Chaisteil Armadail bho chionn beagan sheachdainnean an aghaidh mar a chuir an t-urras an oighreachd air a' mhargaidh

Tha mì-thoileachas air a bhith sa sgìre nach deach bruidhinn ris a' choimhearsnachd mu dheidhinn ro làimh.

Bha mothachadh ann an Slèite gu robh trioblaidean aig an urras leis an oighreachd fhèin agus le a bhith a' cumail nan togalaichean ann an òrdugh.

Tha buidheann bheag de mhuinntir an àite air a bhith a' cur fios air an urras feuch bruidhinn riutha mu na tha san amharc aca.

Thuirt Anndra Prendergast bho Bhuidhean-ceangail Shlèite: "Tha sinn air a bhith a' feuchainn ri bruidhinn ri na h-urrasairean bho chionn bliadhna airson faighinn a-mach de a bha a' tachairt leis an oighreachd ach cha robh iad a-riamh deònach coinneachadh rinn.

"Tha fios gu bheil trioblaidean aca gu sònraichte le na seirbheisean, an dealan, an t-òtrachas agus an t-uisge. Tha sinn air a bhith a' faicinn trioblaidean ann an sin fad bhliadhnaichean."

B' e seanair a' bhuill phàrlamaid ionadail, Aonghas Dòmhnallach, a' chiad cheann-suidhe aig Urras Chlann Dòmhnaill sna seachdadan.

Chan eil teagamh air Mgr Dòmhnallach gu bheil an càirdeas eadar na h-urrasairean, an t-àrd-oifigear agus a' choimhearsnachd "briste" agus chan eil e a' faicinn gu bheil dòigh ann sin a chur ceart.

'S e talamh croitearachd a tha ann am faisg air dàrna leth na h-oighreachd agus tha e ag ràdh gur e glè bheag de theachd a-steach a gheibhear bhon fhearann sin.

"Tha e air a' mhargaidh airson £6,750,000. Tha mi a' smaoineachadh gur e tòrr airgid a tha sin. Chan eil fhios agam an deadh aig neach sam bith a cheannaicheadh e feum a dhèanamh dhen talamh.

"S e mo bheachd pearsanta gum bu chòir dhan airgead sin a bhith air a chosg air a' chaisteal, na gàrraidhean agus an taigh-tasgaidh, 'son sin aon de na prìomh làraichean ann an ceann a deas an eilein.

"Tha e gu math cudtromach do thurasachd. Tha e a' toirt cosnaidh do mhòran dhaoine sa sgìre, agus tha mi a' smaoineachadh gum biodh sin math dha-riribh.

Chuir BBC Naidheachdan fios air Urras Chlann Dòmhnaill agus tha sinn fhathast a' feitheamh ri beachd bhuapa.

Tha miann ann gun gabh an caisteal, an taigh-tasgaidh agus na gàrraidhean a chumail a' dol agus gur ann ann an làmhan na coimhearsnachd a bhios iad aig a' cheann thall.

Ach bhiodh cnap math airgid a dhìth airson na togalaichean a thoirt gu ìre.

Chaidh innse bho chionn ghoirid gum feumadh an cafaidh aig a' chaisteal dùnadh airson a' chòrr dhen t-seasan agus an togalach sin feumach air càradh.

Dh'iarradh Fearann Coimhearsnachd na h-Alba gum biodh ùine gu leòr aig coimhearsnachd 'son beachdachadh air dè tha iadsan ag iarraidh a dhèanamh ma thèid am fearann far a bheil iad a' fuireach air a' mhargaidh.

Thuirt an t-oifigear conaltraidh aca, Norrie Mac'Illinnein: "Aig an ìre seo bhiodh sinne airson gun deadh stad a chur air reic na h-oighreachd agus gum biodh ùine ann airson daoine beachdachadh air a bheil iad airson pàirt dheth a ghabhail thairis, a bheil iad airson a' mhòr-chuid dheth a ghabhail thairis, a bheil iad airson an caisteal fhaighinn, no a bheil iad airson rudeigin a dhèanamh leis an talamh chroite mar eisimpleir, agus co-dhùnadh a dhèanamh timcheall air na gnothaichean sin.

"Ach 's e an rud a bhiodh cudromach gum biodh dàil ann gus am biodh cothrom ann dhaibh sin a dhèanamh," thuirt e.

A rèir Anndra Prendergast, 's dòcha gu bheil an t-àm ann airson uachdarain ùra, gu h-àraid buidheann aig a bheil airgead airson a chosg air an àite: "Tha faireachdainn ann, 's dòcha, nach biodh cùisean nas miosa na tha iad air a bhith bho chionn bliadhna no dha, 's le sin tha an t-àm ann airson atharrachaidh."