Coleman yn ansicr am ei ddyfodol

Dim ond tair gêm allan o 12 mae Cymru wedi eu hennill o dan arweiniaeth Chris Coleman

Mae rheolwr tîm pêl-droed Cymru, Chris Coleman wedi dweud ei fod yn ansicr am ei ddyfodol yn y swydd.

Mae Coleman wedi bod dan bwysau wedi nifer o ganlyniadau sâl, a dydd Iau daeth mwy o feirniadaeth wedi iddo ddewis pedwar chwaraewr oedd wedi eu hanafu yng ngharfan Cymru.

Roedd Coleman, sydd â chytundeb hyd at fis Tachwedd, wedi cytuno estyniad o ddwy flynedd cyn gemau'r Dreigiau yn erbyn Macedonia a Serbia.

Ond nawr mae Coleman wedi dweud y bydd yn aros tan ar ôl y gemau nesaf yn erbyn Macedonia a Gwlad Belg cyn penderfynu ar ei ddyfodol.

Ansicr

Collodd Cymru eu pedwar gêm gyntaf dan reolaeth Coleman, a dim ond tri allan o 12 mae Cymru wedi llwyddo i'w hennill ers iddo gymryd y swydd.

Mae prif weithredwr Cymdeithas Pêl-droed Cymru, Jonathan Ford wedi awgrymu y gall canlyniadau'r tîm dros y gemau nesaf benderfynu dyfodol y rheolwr.

Ond dywedodd Coleman na fyddai hynny yn effeithio ar ei baratoadau.

"Rydw i wedi gweld y sylwadau yn dweud y byddaf yn cael fy meirniadu ar y gemau nesaf," meddai.

"Os dyna yw'r achos, nid yw hynny'n iawn, mae'n rhaid penderfynu ar sail darlun ehangach, ond nid nawr yw'r amser iawn i arwyddo cytundeb."

Dywedodd y rheolwr ei fod wedi trafod canlyniadau diweddar gyda'r Gymdeithas Bêl-droed ddydd Llun, ond nad oedd unrhyw dargedau wedi eu gosod.

"Ar hyn o bryd mae'n edrych yn ddrwg. Ond os ydyn ni'n curo Macedonia fydd hi'n well.

"Bydd pobl yn dweud 'wel gall Chris arwyddo'r cytundeb nawr', ond efallai 'wna i ddim.

Er nad yw James Collins yng ngharfan Cymru, honnodd Coleman nad dyma oedd diwedd ei yrfa rhyngwladol

"Dwi ddim yn gwybod fy hun. Dwi'n cwestiynu gallaf i wneud beth rydw i eisiau ei wneud? Gallaf gyflawni'r hyn rydw i eisiau i'r wlad gyflawni?"

James Collins

Yn y cyfamser mae'r rheolwr wedi gwneud sylw pellach am amddiffynnwr West Ham a Chymru, James Collins.

Ym mis Medi, dywedodd Coleman bod Collins wedi gwrthod cynnig i ymuno gyda'r tîm i'r golled yn erbyn Serbia.

Gwadodd yr amddiffynnwr hynny, gan ddweud na fyddai wedi gwrthod cynnig i chwarae dros ei wlad.

Dywedodd Coleman: "Roeddwn wedi fy siomi a dwi'n meddwl bod James yn anghywir y tro hwn.

"Dwi'n 'nabod James ers amser hir ac mae o'n fachgen da. [Does gen i] ddim problem hefo fo yn bersonol ond y tro hwn dwi'n meddwl ei fod o'n anghywir.

"Roedd James yn flin ac mae hynny'n iawn, ond mae 'na ffordd o ddelio hefo hynny a dwi'n meddwl nad oedd o wedi gwneud hynny y tro yma."