Kirsty Williams yn cefnogi Farron

Roedd Kirsty Williams yn cyfadde' bod yr etholiad wedi bod 'yn ddinistriol' i'w phlaid

Mae arweinydd Democratiaid Rhyddfrydol Cymru Kirsty Williams wedi rhoi ei chefnogaeth i Tim Farron i fod yn arweinydd nesa'r blaid ar draws y DU.

Mae Mr Farron yn gyn lywydd y blaid ac yn un o wyth aelod seneddol y Democratiaid Rhyddfrydol.

Fe wnaeth Ms Williams gyhoeddi datganiad ar y cyd gydag arweinydd Democratiaid Rhyddfrydol yr Alban, Willie Rennie.

Fe ddaw'r datganiad wedi noson drychinebus i'r blaid yn yr etholiad cyffredinol ddydd Iau, 7 Mai.

Fe gollodd y Dem.Rhydd. bron 50 o'u seddau gan adael dim ond wyth aelod seneddol.

Nid yw Tim Farron wedi cadarnhau y bydd yn sefyll hyd yma

Fe ddywed datganiad y ddau:

"Roedd canlyniadau nos Iau yn ddinistriol i'r Democratiaid Rhyddfrydol. Mae'r boen rhywfaint yn llai o wybod y bydd ein gwelliannau rhyddfrydol mewn llywodraeth yn parhau.

"Ond rhaid i ni nawr haeddu'r hawl i gael gwrandawiad yn y dyfodol... er mwyn symud ymlaen rhaid i ni droi dalen newydd.

"Wrth ystyried hynny rydym yn galw ar Tim Farron i fod yn arweinydd nesaf. Rydym yn credu mai ef yw'r person iawn i ailadeiladu'r blaid, ein hysbrydoli ac arwain ein hymgyrchoedd etholiadol y flwyddyn nesaf.

"Fe fyddwn yn ei gefnogi'n llwyr os fydd yn rhoi ei enw ymlaen."

Nid yw Mr Farron wedi cadarnhau y bydd yn sefyll i fod yn arweinydd, ond fe ddywedodd fore Llun bod rhaid i'w blaid "droi dicter yn weithredu" gan fynnu bod ei blaid yn medru cynnig "gobaith ac undod - gwerthoedd sy'n ein tynnu at ein gilydd".