Gwerthwr ceir yn euog o dwyllo cwsmeriaid

Gwyn Meirion Roberts yn gadael Llys y Goron Caernarfon ar ddiwrnod cyntaf yr achos

Mae Llys y Goron Caernarfon wedi cael gwerthwr ceir o Gyffordd Llandudno yn euog o dwyllo cwsmeriaid wrth iddo geisio atal ei fusnes rhag mynd i'r wal.

Fe benderfynodd y rheithgor bod Gwyn Meirion Roberts, 50, yn euog o 22 o gyhuddiadau o dwyll ac un o fasnachu tywyllodrus.

Ond fe'i gafwyd yn ddieuog o ddau gyhuddiad pellach o dwyll.

Bydd yn cael ei ddedfrydu ar 5 Mawrth.

Roedd yr erlyniad wedi dweud yn y llys fod Roberts wedi cynnig bargeinion "anghredadwy" i gwsmeriaid i gael arian pan aeth ei fusnes ar gyrion Bangor, Menai Vehicle Solutions, i drafferthion yn 2015.

Clywodd y rheithgor dystiolaeth gan nifer o gwsmeriaid oedd wedi colli ceir a miloedd o bunnoedd o ganlyniad i arwyddo cytundebau i gyfnewid eu cerbydau.

Clywodd y llys hefyd fod cwsmeriaid wedi talu ernes i Roberts am gar newydd, ond heb dderbyn y cerbyd.

Roedd Roberts yn gwadu ei fod wedi twyllo'n fwriadol, gan ddweud bod siomi cwsmeriaid yn sgil methiant y cwmni wedi ei "lorio".