UEFA yn cadarnhau mai yn Osijek fydd gêm Croatia v Cymru

Mae UEFA wedi cadarnhau bydd y gêm ragbrofol Euro 2020 rhwng Croatia a Chymru yn cael ei chynnal yn Osijek.

Mae yna ddryswch wedi bod ynglŷn â'r gêm wedi i gymdeithas bêl-droed Croatia (HNS) gyhoeddi'n wreiddiol mai yn Osijek y byddai'r gêm yn cael ei chynnal ar 8 Mehefin.

Ond roedd yna oedi o ran penderfynu ar y lleoliad yn derfynol wrth i HNS ddisgwyl i gynrychiolwyr UEFA archwilio Stadion Gradski.

• Euro 2020: Cymru i wynebu Croatia

• Disgwyl cadarnhad am leoliad gêm Croatia

Roedd nifer o gefnogwyr Cymru eisoes wedi gwneud trefniadau teithio, gyda sawl un yn teimlo'n rhwystredig iawn am yr oedi.

Y tro diwethaf i Gymru chwarae yn Osijek oedd yn 2012. Bryd hynny roedd nifer o gwynion ymysg y chwaraewyr ynglŷn â chyflwr y cae, gyda'r capten Ashley Williams yn dweud fod yr amodau'n "warthus".

Croatia fydd trydydd gwrthwynebydd Cymru yn yr ymgyrch ragbrofol, a bydd tîm Ryan Giggs hefyd yn chwarae yn erbyn Slofacia, Hwngari ac Azerbaijan.

Mae CYmru wedi chwarae yn Stadion Gradski yn Osijek ar ddau achlysur yn ddiweddar yn 2010 a 2012