Prosiect gerddoriaeth Gorwelion yn cyhoeddi 12 o sêr newydd

Mae prosiect Gorwelion wedi cyhoeddi'r 12 artist fydd yn derbyn cefnogaeth eleni.

Nod y prosiect blynyddol gan BBC Cymru Wales a Chyngor Celfyddydau Cymru yw cefnogi datblygiad cerddoriaeth annibynnol, gyfoes o Gymru.

Ymysg yr artistiaid sy'n derbyn cefnogaeth eleni mae'r band Gwilym, a enillodd bum gwobr yng Ngwobrau'r Selar 2019.

I ddathlu'r cyhoeddiad, cafodd yr artist Cadi Lane ei chomisiynu i greu gwaith celf yn cynnwys pob band i'w arddangos uwchben Stryd Womanby yng Nghaerdydd.

'Oes aur'

Bydd y cyflwynydd Bethan Elfyn - sy'n rheolwr prosiect ar Gorwelion - a'i thîm yn gweithio gyda'r artistiaid i hybu eu cerddoriaeth, cefnogi eu datblygiad a chodi eu proffil yng Nghymru a thu hwnt.

Dywedodd: "Rydyn ni'n derbyn cannoedd o geisiadau bob blwyddyn ac mae bob amser yn anodd iawn dewis 12 yn unig, ond mae'n deg dweud bod hon yn oes aur i gerddoriaeth Gymreig ar y funud."

Mae Alffa yn un o'r bandiau sydd wedi elwa o gynllun Gorwelion yn y gorffennol

Yn ôl y cyflwynydd radio Huw Stephens, mae'n "gyfnod cyffrous iawn o ran cerddoriaeth o Gymru".

"Mae Boy Azooga, er enghraifft, yn chwarae mewn gŵyl gyda Bob Dylan a Neil Young," meddai.

"Ac mae Alffa - y band roc o ogledd Cymru a oedd yn rhan o Gorwelion llynedd - yn gyfrifol am ysgrifennu Gwenwyn, y gân Gymraeg cyntaf i gael mwy na thair miliwn o wrandawyr ar Spotify.

"Mae hwn yn destament i bobl ar draws y byd sydd ddim yn unig yn gwrando ar gerddoriaeth sy'n dod o Gymru, ond pobl sy'n mynd allan o'i ffordd i'w ddarganfod."

Dyma restr Gorwelion eleni yn llawn:

• Codewalkers

• Darren Eedens & the Slim Pickin's

• Endaf

• Esther

• Eve Goodman

• Gwilym

• HANA2k

• Jack Perrett

• Kidsmoke

• Rosehip Teahouse

• SERA

• Y Cledrau