Achosion o glefyd y tafod glas wedi eu cadarnhau ym Mhowys a Sir Fynwy

Mae achosion o glefyd y tafod glas wedi eu canfod mewn da byw ym Mhowys a Sir Fynwy yn ôl Llywodraeth Cymru.

Mewn neges ar y cyfryngau cymdeithasol fe ddywedodd Adran Materion Gwledig y llywodraeth bod tafod glas math BTV-3 wedi ei ganfod mewn dau safle.

Daw cadarnhad bellach eu bod yn agos i Lanandras ym Mhowys a Chas-gwent yn Sir Fynwy.

Ym mis Mehefin, cafodd cyfyngiadau eu cyflwyno ar symud da byw dros y ffin o Loegr i Gymru ond fe gafodd rhai cyfyngiadau eu llacio ar 21 Medi.

Mae'r llywodraeth yn annog perchnogion da byw i "fod yn wyliadwrus a pharhau i brynu da byw yn ddiogel" ac mae cais wedi cael ei wneud am sylw pellach.

Dyma'r achosion cyntaf o'r feirws yng Nghymru eleni.

Roedd dau achos yn 2024 mewn defaid yng Ngwynedd a Môn a gafodd eu symud o ddwyrain Lloegr.

Mae'r llywodraeth wedi bod yn cyflwyno cyfyngiadau ar symud da byw dros dros y ffin o Loegr i Gymru mewn ymateb i ledaeniad y clefyd a rhoi cyfle i ffermwyr frechu eu da byw.

Yn y neges ar y cyfryngau cymdeithasol mae'r llywodraeth yn annog unrhyw un sy'n amau bod gan eu da glefyd y tafod glas i siarad gyda'u milfeddyg a rhoi gwybod i'r Asiantaeth Iechyd Anifeiliaid a Phlanhigion APHA.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.