Cyngor Môn: Prinder staff yn 'arafu ceisiadau cynllunio'

Mae Cyngor Môn wedi dweud mai diffyg staff sy'n eu hatal rhag dod i benderfyniad ar geisiadau cynllunio ar amser.

Clywodd Pwyllgor Craffu Corfforaethol Cyngor Ynys Môn mai dim ond 81% o geisiadau cynllunio â benderfynwyd ar amser, gan fethu'r targed o 90%.

Mae'r cyngor yn anelu i ddod i benderfyniad ar geisiadau cynllunio o fewn wyth wythnos o dderbyn y cais.

Dywedodd un o benaethiaid y pwyllgor cynllunio bod diffyg staff yn ganlyniad "symleiddio gwasanaethau'r cyngor".

• Môn yn atal cynllun ad-drefnu addysg

• 'Tro pedol' dros ad-drefnu ysgolion Môn

Wrth ymateb i fethiant y pwyllgor i gyrraedd eu targed, cyfeiriodd y Cynghorydd Richard Dew am y trafferthion a achoswyd gan ddiffyg staff.

"Rydym yn aml yn trafod gallu'r staff, ond fe all absenoldeb un swyddog gael effaith mawr," meddai.

Yn ôl swyddogion, gwelwyd y perfformiad gwaethaf rhwng Hydref a Rhagfyr 2018 - dim ond 74% o'r ceisiadau gafodd eu penderfynu mewn pryd.

'Ymdopi â llwyth gwaith'

Dywedodd prif swyddog cynllunio'r cyngor bod "llawer wedi ei wneud i symleiddio gwasanaethau'r cyngor a datblygu systemau newydd dros y flwyddyn ddiwethaf.

"Mae hyn yn golygu ein bod wedi gorfod gwerthuso swyddi a chyfrifoldebau aelodau'r tîm, sydd wedi cael effaith ar y llif gwaith a pherfformiad," meddai Dewi Francis Jones.

"Rydym hefyd wedi bod yn ceisio ymdopi â'r llwyth gwaith yn y maes gorfodi, sydd unwaith eto, yn ffactor."

Esboniodd bod y gwaith yn angenrheidiol a'u bod nhw mewn sefyllfa well i fod yn symud ymlaen.

Clywodd y cyfarfod fod yr awdurdod wedi gorffen y flwyddyn gyda gorwariant o £633,000 - sy'n well na beth oedden nhw yn ei ddisgwyl.