Cwest Tregaron: Marwolaeth drwy anffawd

Roedd mam Tristan Silver (canol, gwallt hir) yn gyrru ei phlant i'r ysgol pan ddigwyddodd y ddamwain

Mae cwest wedi dod i'r casgliad mai marwolaeth drwy anffawd oedd marwolaeth bachgen 11 oed a fu farw mewn gwrthdrawiad ger Tregaron y llynedd.

Clywodd cwest yn Aberystwyth sut cafodd Tristan Silver anafiadau difrifol yn y gwrthdrawiad ar yr A485 ym mhentref Olmarch ym mis Mai 2018 wedi i bry cop dynnu sylw'r gyrrwr.

Yn fuan wedi ei farwolaeth, daeth i'r amlwg ei fod wedi ennill cystadleuaeth gwaith cartref yn Eisteddfod yr Urdd 2018.

Digwyddodd y ddamwain am 08:45 ar ddydd Gwener 4 Mai, 2018.

Roedd Tristan - disgybl yn Ysgol y Dderi yn Llangybi - yn cael ei yrru i'r ysgol gan ei fam, Cloud Younger.

• Gwrthdrawiad A485: Bachgen 11 wedi marw

• Gwobr Eisteddfod i fachgen fu farw

Roedd Tristan yn eistedd yn y sedd gefn, tra bod ei chwaer 8 oed, Branwen, yn eistedd yn y sedd flaen pan wnaeth Subaru glas Mrs Younger daro i mewn i gar Mitsubishi du oedd yn tynnu trelar yn llawn o ddefaid.

Clywodd y cwest nad oedd gyrrwr y Mitsubishi du ar fai mewn unrhyw ffordd am y ddamwain.

Dywedodd Mrs Younger fod pry cop wedi glanio ar ei llaw chwith ychydig eiliadau cyn y gwrthdrawiad, a bod ei merch wedi dechrau sgrechian.

Esboniodd ei bod wedi troi at ei merch er mwyn ceisio'i thawelu tra roedd hi'n gyrru.

Dywedodd David Glyndŵr Jones, gyrrwr y Mitsubishi bod yr holl beth wedi "digwydd mewn chwe eiliad".

Eglurodd ei fod wedi gweld y Subaru yn symud yn araf i ochr anghywir y ffordd. Clywodd y cwest fod car Mr Jones wedi stopio bron yn llwyr pan ddigwyddodd y gwrthdrawiad.

Ychwanegodd Mr Jones ei fod wedi meddwl y byddai'r Subaru yn symud yn ôl i ochr gywir y ffordd, ond na wnaeth hynny ddigwydd.

Roedd Tristan yn ddisgybl yn Ysgol y Dderi, Llangybi.