Llywodraeth Cymru yn rhoi 'pwysau' ariannol ar brifysgol

Mae prifysgol yng Nghymru yn wynebu ansefydlogrwydd ariannol yn sgil "oedi parhaus" gan Lywodraeth Cymru am Fargen Ddinesig Bae Abertawe, yn ôl eu Prif Ganghellor.

Dywedodd Prifysgol y Drindod Dewi Sant bod yna "amheuon mawr" dros eu dyfodol.

Mewn llythyr i randdeiliaid, sydd wedi dod i sylw Newyddion 9, mae'r Athro Medwin Hughes yn dweud bod diffyg arian gan y Fargen Ddinesig Bae Abertawe wedi rhoi "pwysau na welwyd o'r blaen ar y brifysgol".

Dywedodd Llywodraeth Cymru eu bod nhw'n anelu i wneud cyhoeddiad "yn fuan".

Mae Medwin Hughes yn mynnu nad ydy dyfodol y brifysgol mewn perygl

Beth yw Bargen Ddinesig Bae Abertawe?

• Cafodd ei arwyddo dwy flynedd yn ôl gan Theresa May gyda'r nod o ysgogi twf economaidd yn ardaloedd Abertawe, Sir Gâr, Castell-nedd Port Talbot a Sir Benfro;

• Mae'n cyfuno pedwar cyngor, dau fwrdd iechyd, dwy brifysgol a busnesau, ac yn cael ei gefnogi gan gymysgedd o arian preifat cyhoeddus;

• Mae'r cynlluniau yn cynnwys sefydlu adnoddau hamdden, addysg ac iechyd - gyda'r bwriad o gyfrannu £1.3bn i economi'r ardal a chreu 9,000 o swyddi;

• Mae'n derbyn £40m gan Lywodraeth y DU a Llywodraeth Cymru.

Wrth gyfeirio at adroddiad newyddion BBC Cymru, mae'r Athro Hughes yn sôn am fater penodol lle mae'r brifysgol yn aros i dderbyn symiau cyfalaf untro.

Mae'r llythyr yn dweud: "Ar ddiwedd y flwyddyn ariannol ddiwethaf nid oedd y symiau hyn wedi dod i law yn sgil ffactorau allanol y tu hwnt i reolaeth y brifysgol.

"Nid yw dyfodol y brifysgol mewn perygl. Mae'n parhau i reoli'r sefyllfa ariannol ac ymateb i gyfyngiadau allanol fel y mae pob sefydliad Addysg Uwch arall yng Nghymru."

Ond mae'n parhau i drafod "un mater allweddol sy'n gysylltiedig â'r sefyllfa gyfredol", sef yr "oedi parhaus am gymeradwyaeth ariannol gan Lywodraeth Cymru mewn perthynas â'n hymrwymiad o fewn Bargen Ddinesig Bae Abertawe".

Dywedodd bod y brifysgol wedi cael gwybod gan Fwrdd Bargen Ddinesig Bae Abertawe "ar sawl achlysur" fod y cyllid "ar fin digwydd".

Cafodd y Brifysgol £3m o gyllid gan Lywodraeth Cymru am y gwaith yn yr Egin, wedi iddi ddod i'r amlwg na fyddan nhw'n cael arian gan yr Undeb Ewropeaidd

Mae'r Egin - hwb creadigol newydd a phencadlys yr S4C - a'r datblygiad SA1 Glannau Abertawe yn rhan o ymgais y brifysgol i sicrhau cyllid ar gyfer y fargen ddinesig.

Mae hi wedi dod i'r amlwg fod y Brifysgol wedi gofyn am £3m o gyllid o'r fargen ddinesig ar gyfer cam 1 o'r Egin, sy'n fodel cyllido gwahanol i'r hyn a gyflwynwyd i bwyllgor o ASau Cymru yn 2017.

Dywedodd llefarydd ar ran Llywodraeth Cymru: "Mae partneriaeth Bargen Ddinesig Bae Abertawe wedi cyflwyno cynllun busnes pum achos ar gyfer prosiect Yr Egin - sy'n cael ei ystyried ar hyn o bryd gan Lywodraeth Cymru a Llywodraeth y DU.

"Ein nod yw gwneud cyhoeddiad yn fuan."