Ysgolion yn agor yn ystod gwyliau'r haf er lles plant

Peintio yn yr ysgol

Bydd cyfle i blant gymryd rhan mewn gweithgareddau chwaraeon a chael brecwast a chinio

Mae mwy a mwy o ysgolion yn dewis agor eu drysau yn ystod gwyliau'r haf er mwyn i blant allu cymryd rhan mewn gweithgareddau ac i fwyta ar rai achlysuron.

Am dair wythnos dros y gwyliau, mae disgwyl i tua 3,700 o blant mewn 76 o ysgolion ledled Cymru fynd yn ôl i'r ysgol - cynnydd o tua 1,000 ar ffigwr y llynedd.

Yn lle gwersi ffurfiol, fe fyddan nhw'n cymryd rhan mewn chwaraeon a gweithgareddau eraill, ond hefyd yn cael brecwast a chinio yn yr ysgol.

Unwaith yr wythnos bydd rhieni yn ymuno â'u plant am ginio.

Mae'r cyfan yn rhan o gynllun o'r enw Rhaglen Gwella Gwyliau'r Haf, sy'n cael ei ariannu gan Lywodraeth Cymru.

Dywedodd Janet Hayward bod agor dros yr haf wedi dod yn "rhan ganolog o'n hysgol"

Cafodd y cynllun ei sefydlu oherwydd pryder nad yw rhai plant yn cael bwyd maethlon yn ystod gwyliau ysgol, ac mae unigrwydd a diffyg gweithgareddau i'w diddori hefyd yn achosi pryder.

"Mae'n plant a'n teuluoedd ein hangen ni i fod yno iddyn nhw, nid yn ystod y tymor yn unig ac nid yn y ffordd draddodiadol yn unig," meddai Janet Hayward, pennaeth Ysgol Gynradd Tragatwg yn Y Barri.

"Mae o wedi dod yn rhan ganolog o'n hysgol."

'Sgandal genedlaethol'

Eleni bydd y cynllun yn costio £900,000 i'w redeg, ond yn ôl Sefydliad Bevan - mudiad sy'n gweithio i leihau tlodi - nid yw hynny'n agos at fod yn ddigon i gyrraedd yr holl blant sydd wir angen gwasanaeth o'r fath.

Mewn adroddiad ar yr hyn maent yn ei alw'n "sgandal genedlaethol" mae'r sefydliad yn dweud y byddai'n costio £4.75m i warantu lle ar y cynllun i chwarter y plant sydd â hawl i ginio ysgol am ddim.

Dywedodd llefarydd ar ran Llywodraeth Cymru eu bod wedi cynyddu'r cyllid ar gyfer y rhaglen o £400,000 i £900,000 eleni.

Cymerodd bron i 2,500 o blant ran yn y cynllun y llynedd.

Straeon perthnasol