Cymeradwyo gorsaf bŵer newydd ger Abertawe

Argraff artist o bwerdy Abergelli

Mae cais datblygu ar gyfer gorsaf bŵer nwy ar gyrion Abertawe wedi ei gymeradwyo gan Ysgrifennydd Busnes, Ynni a Strategaeth Ddiwydiannol Llywodraeth y DU.

Cafodd cais gwreiddiol Abergelli Power Limited (APL) ei gyflwyno dros flwyddyn yn ôl.

Bydd yr orsaf yn gallu cynhyrchu 299 MW o drydan gyda phwyslais ar fedru ymateb yn gyflym i anghenion y National Grid ar adegau prysur.

Bydd yr orsaf wedi'i lleoli i'r gogledd o ddinas Abertawe rhwng Llangyfelach a Llwyncelyn.

Mae'r penderfyniad yn dilyn cymeradwyaeth i'r cynllun gan yr Arolygiaeth Gynllunio yn dilyn proses ymgynghori o chwe mis.

Dywedodd cwmni APL y gallai'r orsaf ddechrau cynhyrchu trydan erbyn 2022 unwaith bydd cyllid a chynllunio mewn lle.