Covid-19: Canslo Sesiwn Fawr Dolgellau am eleni

gwilymffotonant

Gwilym ar lwyfan y Sesiwn Fawr yn 2019

Ni fydd Sesiwn Fawr Dolgellau yn cael ei chynnal eleni oherwydd y pandemig coronafeirws.

Roedd yr ŵyl i fod i gael ei chynnal rhwng 17 a 19 Gorffennaf.

Dywedodd y trefnwyr mewn datganiad: "Ar ôl wythnosau o fonitro a thrafod, rydym ni fel pwyllgor wedi penderfynu canslo Sesiwn Fawr Dolgellau 2020.

"Rydym yn hynod siomedig ein bod yn canslo, ond mae iechyd a diogelwch ein cynulleidfa, yr holl artistiaid a chymuned Dolgellau yn bwysicach."

'Sesiwn FAWR yn 2021'

Ychwanegodd y trefnwyr: "Roedd gennym ni glincar o lein yp ar eich cyfer, ac rydym yn mawr obeithio y byddwn yn gallu gwahodd nifer fawr o'r artistiaid yn ôl ar gyfer yr ŵyl yn 2021.

"I'r rheiny sydd eisoes wedi archebu tocynnau, mae croeso i chi dderbyn ad-daliad neu eu defnyddio ar gyfer Sesiwn Fawr Dolgellau, 16-18 Gorffennaf 2021."

Doedd y trefnwyr ddim wedi cyhoeddi rhestr yr artistiaid ar gyfer yr ŵyl, ond dros y blynyddoedd mae enwau mawr ymhlith perfformwyr Cymru a thu hwnt wedi ymddangos ar lwyfan yr ŵyl.

Bydd mwy o fanylion am sut i gael ad-daliad i'r rhai sy'n dymuno hynny yn ymddangos ar wefan y Sesiwn Fawr a'r cyfryngau cymdeithasol cyn hir.

Roedd y datganiad yn gorffen gyda gair o ddiolch: "Diolch i chi gyd am eich cefnogaeth - cadwch yn saff ac edrychwn ymlaen am Sesiwn FAWR yn 2021."

Straeon perthnasol