Sŵ Borth yn cael mwy o amser i dalu bil treth o £75,000

Mae'n rhaid i berchnogion Borth Wild Animal Kingdom, Tracy and Dean Tweedy, dalu bil treth o £75,000

Mae sŵ sy'n wynebu bil treth gwerth £75,000 wedi cael mwy o amser i'w dalu.

Mae Borth Wild Animal Kingdom yng Ngheredigion yn ymchwilio i weld a oes ganddyn nhw hawl i £85,000 gan Gyllid a Thollau EM, a fyddai'n talu am eu dyled.

Fe hawliodd y sŵ y penawdau yn 2017 pan fu farw dwy lyncs o dan eu gofal, ac am dorri amodau trwyddedu cynghorau.

Yn gynharach eleni, fe gaeodd y sŵ yn dilyn beirniadaeth o'u trefniadau diogelwch wrth ymwneud â'u hanifeiliaid mwyaf peryglus.

• Ail lyncs o sŵ'r Borth wedi marw

• Sŵ Borth 'i gau am rai dyddiau'

Cyhoeddodd Cyllid a Thollau EM ddeiseb i'r cwmni gael ei ddirwyn i ben dros yr ôl-ddyledion ac ers hynny bu tri gwrandawiad llys.

Doedd neb yn bresennol i gynrychioli'r cwmni yn y gwrandawiad ar-lein ddydd Mercher o Uchel Lys Llundain.

Ond rhoddodd y barnwr ohiriad tan 26 Awst i "setlo" yr achos.

Roedd yna luniau o Lilleth ar gamera wedi iddi ddianc yn 2017, ac roedd sawl ymdrech i'w dal

Nôl ym mis Tachwedd 2017 cafodd y sŵ eu gwahardd rhag cadw anifeiliaid categori un am gyfnod ar ôl i lyncs lwyddo i ddianc.

Fe benderfynodd Cyngor Ceredigion ar y pryd fod bai ar y sŵ am beidio â dal Lilleth y lyncs cyn iddi roi'r cyhoedd mewn perygl.

Cafodd y lyncs ei difa yn ddiweddarach gan swyddog arbenigol.

Daeth hi i'r amlwg wedyn bod ail lyncs wedi marw drwy gael ei mygu wrth iddi gael ei chludo o un warchodfa i'r llall.

Ym mis Ionawr eleni, cafodd y sŵ gyfarwyddyd i gau llociau eu hanifeiliaid mwyaf peryglus oherwydd "trefniadau annigonol" pe bai anifail peryglus yn dianc.