Apêl i ymwelwyr gadw draw o ardal rhaeadrau poblogaidd

Mae Heddlu Dyfed-Powys a swyddogion Parc Cenedlaethol Bannau Brycheiniog yn rhybuddio ymwelwyr i gadw draw o ardal o gwmpas Pontneddfechan.

Mae'r ardal yn adnabyddus iawn am ei phistylloedd prydferth, ond yn ôl pobl leol mae gormod o bobl yn dod i'r ardal ac yn achosi tensiynau gyda thrigolion.

Mae'r awdurdodau yn poeni gymaint am benwythnos Gŵyl y Banc fel eu bod yn cynghori pobl yn uniongyrchol i beidio ymweld â'r ardal.

Yn ôl yr Arolygydd Gwyndaf Bowen o Heddlu Dyfed-Powys, mae'r ardal yn gweld gormod o ymwelwyr ers i'r cyfyngiadau teithio gael eu llacio.

Mae'r twf yn nifer yr ymwelwyr yn arwain at sawl problem, medd yr Arolygydd Gwyndaf Bowen

"Ers i'r rheolau dod i ben, 'da ni wedi gweld...tair gwaith mwy 'na beth sydd efo ni fel arfer, a mae hynny wedi creu problem mawr," meddai.

"Mae parcio wedi bod yn broblem, mae plant wedi mynd ar goll efo ni ac wedyn mae rhaid i ni rhoi lot o swyddogion i mewn i'r ardal i sortio hynna allan.

Mae gan yr heddlu neges glir i bobl sy'n ystyried ymweld â'r ardal.

"Am y penwythnos hyn mae'n well aros adre," meddai. "Bydd 'na nifer o bobl yma, fydd dim lle i barcio o gwbl. Mae'r heddlu yn dweud a mae'r parciau cenedlaethol yn dweud bod well aros o yma jest rhag ofn."

Mae Richard Tyler yn gweithio i Barc Cenedlaethol Bannau Brycheiniog.

"Da ni'n dwlu ar weld pobl yn dod mas i'r wlad yn mwynhau ei hun," meddai, "ond mae e wedi rhoi pwysau mawr ar y system.

"Mae pobl yn dod yma gyda nifer o geir gwahanol o fewn yr un teulu. Lle bydden ni wedi gweld un car, rydyn ni'n gweld tri neu pedwar car yn dod i'n meysydd parcio."

"Y broblem yw bod y lonydd yma yn gul iawn iawn… os ma' dau car yn cwrdd mae'n achosi problemau mawr achos does 'na ddim lot o lefydd i basio ceir eraill."

Trafferthion parcio ar lonydd cul ardal rhaeadrau Ponetneddfechan

Yn ôl Mr Tyler roedd pob un o'r meysydd parcio yn yr ardal yn llawn dop erbyn 10:00 bore Gwener, a hynny er nad oedd y tywydd yn braf. Mae'n poeni'n arw am sut all bethau fod dros penwythnos Gŵyl y Banc os yw'r tywydd yn braf.

"Da ni'n bryderus iawn dros y penwythnos yma. Da ni'n gweithio'n agos gyda'r awdurdodau i gyd...bydd 80 staff ychwanegol yn gweithio i geisio helpu'r sefyllfa.

"Penwythnos diwethaf roedd rhaid i ni droi pobl eraill i ffwrdd ger Penderyn achos roedd gormod o bobl yma yn gynnar iawn."