Horizon yn tynnu'r plwg ar gynllun Wylfa Newydd

Bydd cynllun i adeiladu gorsaf bŵer niwclear ar Ynys Môn yn dod i ben yn swyddogol ar 31 Mawrth 2021

Mae'r datblygwyr y tu ôl i gynlluniau ar gyfer gorsaf ynni niwclear newydd gwerth £20bn yn Ynys Môn wedi tynnu eu cais yn ôl.

Mae Pŵer Niwclear Horizon wedi beio diffyg opsiynau cyllido gan Lywodraeth y DU i wireddu cynllun Wylfa Newydd.

Ym mis Medi, cefnodd cwmni Hitachi ar y cynllun, a oedd yn addo creu tua 9,000 o swyddi.

Dywedodd Horizon fod penderfyniad Hitachi i dynnu allan o'r cynllun hefyd yn ffactor yn eu penderfyniad.

Ers hynny mae cwmni arall wedi datgelu cynlluniau ar gyfer gwaith pŵer llai a fferm wynt ar safle ar wahân yn Wylfa.

• Wylfa Newydd: 'Trafodaethau calonogol yn parhau'

• Gwerthu tŷ i Hitachi a 'chwalu cymuned'

• Penderfyniad Wylfa yn rhyddhad i ffermwyr gerllaw

Daeth y gwaith ar Wylfa Newydd i stop ym mis Ionawr 2019 achos costau cynyddol wedi i Hitachi a Llywodraeth y DU fethu a dod i gytundeb am gefnogaeth ariannol i'r fenter.

Ar 16 Medi y llynedd, cyhoeddodd Hitachi eu bod yn cefnu ar y prosiect yn llwyr.

Roedd gwrthwynebwyr y prosiect, fel y grŵp ymgyrchu PAWB, wedi dadlau'n gyson o blaid buddsoddi mewn ynni adnewyddadwy yn ei le.

Dirwyn Horizon i ben

Mae Horizon wedi ysgrifennu at yr Arolygiaeth Gynllunio a'r Adran Busnes, Ynni a Strategaeth Ddiwydiannol, yn cadarnhau diwedd y prosiect cythryblus.

Dywedodd y llythyr fod trafodaethau â thrydydd partïon ynghylch cyllid wedi bod yn gadarnhaol, ond nad oedd unrhyw gynigion addas wedi dwyn ffrwyth.

Ychwanegodd: "Fel y gwyddoch, cyhoeddodd Hitachi atal y prosiect ym mis Ionawr 2019 a'i fwriad i dynnu'n ôl yn llwyr ym mis Medi 2020.

"Yng ngoleuni hyn ac yn absenoldeb polisi cyllido newydd gan Lywodraeth y DU, mae Hitachi Ltd. wedi gwneud y penderfyniad i ddirwyn Horizon i ben fel endid datblygu gweithredol erbyn 31 Mawrth 2021.

"O ganlyniad, mae'n rhaid i ni nawr, yn anffodus, dynnu'r cais yn ôl."

Mewn datganiad, dywedodd prif weithredwr Horizon, Duncan Hawthorne, y byddai'r cyhoeddiad yn siomedig i gefnogwyr y prosiect.