Cynllun i godi adweithyddion niwclear ym Môn

Bwriad y cwmni yw codi adweithyddion bychain ar y safle

Fe allai adweithyddion niwclear bychain ynghyd â fferm wynt gael eu codi ar Ynys Môn pe bai cynlluniau cwmni ynni yn cael eu gwireddu.

Dywed Shearwater Energy mai eu bwriad yw codi'r safle newydd am lai na £8bn, gan ddechrau cynhyrchu trydan erbyn 2027.

Mae Shearwater wedi clustnodi safle yn Wylfa, ond ar safle gwahanol i un Pŵer Niwclear Horizon - lle mae'r cynllun i godi atomfa Wylfa Newydd wedi ei ohirio.

• Hitachi'n tynnu'n ôl o gynllun codi Wylfa Newydd

• Trafodaethau am safle Wylfa Newydd yn parhau

• Wylfa: Dyfalu fod cwmni o'r UDA yn arwain consortiwm

Mae Shearwater yn cydweithio ar y cynllun gyda chwmni NuScale o'r Unol Daleithiau, gyda'r bwriad i godi adweithyddion bychain mewn rhannau eraill o'r Deyrnas Unedig ac Iwerddon.

Dywedodd Siom Forster, cyfarwyddwr Shearwater Energy, fod y cwmni wedi mynd ati i lunio eu cynlluniau ar ôl i gwmni Hitachi benderfynu cefnu ar brosiect Wylfa Newydd ym mis Medi.

Yn ôl cynllun Shearwater, byddai'r safle yn Wylfa yn cynnwys 12 adweithydd gyda'r gallu i gynhyrchu 924 Megawatt - ynghyd â fferm wynt 1,000 MW.

Mae 1,000 MW yn ddigon i gyflenwi tua 300,000 o gartrefi.

Yn ogystal, fe fyddai'r safle yn cynhyrchu tri miliwn cilogram o nwy hydrogen, i'w ddefnyddio yn y sector drafnidiaeth.

Mae'r cwmni yn awyddus i godi safleoedd ar gyfer adweithyddion eraill, yn enwedig yr Alban ac Iwerddon.

Ym mis Medi, cefnodd cwmni Hitachi ar y cynllun gwerth £20bn i godi atomfa ar safle Wylfa Newydd

Dywed Mr Forster y byddai'n bedair blynedd o leiaf cyn gallai'r gwaith o adeiladu'r adweithyddion ym Môn ddechrau.

Ychwanegodd y byddai'r safle yn creu 300 o swyddi parhaol am 60 mlynedd.

Yn ôl ffigyrau'r cwmni, byddai'r gost o adeiladu'r safle 40% yn llai na safle niwclear confensiynol.

Ychwanegodd fod y cwmni yn hyderus y gallant gyflenwi trydan am bris "sy'n hynod gystadleuol o'i gymharu â'r hyn sy'n cael ei gynhyrchu gan orsafoedd nwy.

Dywedodd llefarydd ar ran Adran Busnes, Ynni a Strategaeth Diwydiannol San Steffan eu bod yn ymwybodol o gynnig Shearwater.