Y Gleision i ail frandio fel Rygbi Caerdydd o'r tymor nesaf

Bydd Gleision Caerdydd yn gollwng y gair Gleision o'u henw o'r tymor nesaf ymlaen, gan ail-frandio fel Rygbi Caerdydd.

Mae'r clwb wedi lansio logo newydd, ac fe fyddan nhw'n dychwelyd i chwarae mewn crysau glas a du.

Bydd y clwb arall yn y brifddinas, sy'n chwarae yn Uwch Gynghrair Cymru, yn parhau dan yr enw Clwb Rygbi Caerdydd, neu Cardiff RFC.

"Rydyn ni'n gweld y newid hwn fel cam allweddol yn natblygiad rygbi ar y lefel uchaf yng Nghaerdydd," meddai prif weithredwr y clwb, Richard Holland.

Mae'r tîm wedi defnyddio'r enw Gleision Caerdydd ers i'r rhanbarthau gael eu creu yn 2003

Yr enw Gleision Caerdydd oedd yr unig un i beidio newid ers i'r rhanbarthau gael eu creu 18 mlynedd yn ôl.

Mae'r Dreigiau, Scarlets a'r Gweilch eisoes wedi newid eu henwau, gan dynnu'r lleoliadau, tra bod pumed rhanbarth - Y Rhyfelwyr Celtaidd - wedi chwarae un tymor yn unig cyn chwalu.

Ond cefnu ar y llysenw mae'r Gleision - gan gadw'r lleoliad.

Mae'r newid enw yn annhebygol o fod yn boblogaidd yn y rhannau o'r rhanbarth sydd y tu allan i Gaerdydd, fel y cymoedd.

Ond dywedodd y clwb bod y penderfyniad wedi'i wneud ar ôl ystyried o ble daw'r cefnogwyr presennol, adborth gan gefnogwyr a thrafodaethau gyda grwpiau cefnogwyr, noddwyr a phartneriaid eraill fel Undeb Rygbi Cymru.