Plaid Diddymu'r Cynulliad eisiau 'troi'r llanw ar ddatganoli'

Dywedodd y blaid y byddai diddymu'r Senedd yn cael gwared ar "haen gyfan o wleidyddion"

Mae Plaid Diddymu'r Cynulliad Cenedlaethol wedi lansio eu cynlluniau polisi ar gyfer etholiad fis nesaf.

Maen nhw'n cynnwys diddymu'r Senedd, rhoi pwerau dros dreth yn ôl i San Steffan ac uno gwasanaeth iechyd Cymru a Lloegr.

Dywedodd yr arweinydd Richard Suchorzewski ei bod yn amser "atal Cymru rhag cerdded yn ei chwsg tuag at annibyniaeth".

Mae gan y blaid ddau aelod yn Senedd Cymru ar hyn o bryd - dau a gafodd eu hethol dros UKIP yn 2016 ond sydd bellach wedi newid plaid.

Ond dydy un o'r rheiny ddim yn sefyll yn enw Plaid Diddymu'r Cynulliad ar 6 Mai - yn hytrach mae'n ymgeisydd annibynnol.

'Dim mwy o dargedau iaith Gymraeg'

"Yn ein datganiad polisi rydyn ni'n rhoi blas o sut y byddwn yn mynd ati i gynrychioli'r rheiny sy'n amheus o ddatganoli yng Nghynulliad Cymru [Y Senedd]," meddai Mr Suchorzewski.

"Dim mwy o bwerau, dim mwy o wleidyddion, dim mwy o dargedau iaith Gymraeg.

"Mae'n amser i'r llanw droi yn erbyn datganoli er mwyn atal Cymru rhag cerdded yn ei gwsg tuag at annibyniaeth."

• POLISÏAU: Cymharwch addewidion y pleidiau

• CANLLAW: Canllaw syml i Etholiad Senedd Cymru 2021

• DWY GROES MEWN DAU FLWCH: Pam bod gennych chi ddwy bleidlais?

• PWY SY'N SEFYLL YN FY ARDAL I?: Rhowch eich cod post yn y blwch

• PODLEDIAD: Croes yn y bocs

Mae'r blaid yn disgrifio'r datganiad polisi fel "ein map i achub Cymru a'r undeb wrth ddadwneud datganoli".

Dywedodd mai ei nod ydy "diddymu Cynulliad Cymru [Y Senedd] a dod â llywodraethiant ddatganoledig yng Nghymru i ben".

"Fe ddylen ni fod yn Deyrnas Unedig unwaith eto, gydag un Llywodraeth y DU," meddai'r blaid.

Dywedodd Richard Suchorzewski fod y blaid eisiau "achub Cymru a'r undeb wrth ddadwneud datganoli"

Dywedodd y blaid mai prif ganlyniadau hyn fyddai:

• Cael gwared ar "haen gyfan o wleidyddion - 60 eisoes ym Mae Caerdydd ond bydd hynny'n 90 yn fuan, gan arbed y £65m+ sydd ei angen i'w cefnogi";

• Rhoi pwerau dros dreth yn ôl i San Steffan "fel na allwn gael ein gorfodi i dalu mwy o dreth yng Nghymru, sydd wedi'i gwneud gymaint yn dlotach gan ddatganoli";

• Cael un Gwasanaeth Iechyd ar gyfer Cymru a Lloegr "fel y gall cleifion yng Nghymru gael eu trin yn gyfartal i Loegr";

• Rhoi caniatâd i academïau ac ysgolion rhydd agor yng Nghymru [fel yn Lloegr] fel y bydd "dewis gwell o ysgolion, gan gynnwys pa bynciau sy'n cael eu dysgu a'r iaith sy'n cael ei ddefnyddio";

• Cael gwared ar y targed o filiwn o siaradwyr Cymraeg erbyn 2050 a gofyn i'r sector cyhoeddus "gyfathrebu yn Gymraeg pan fo cais i wneud hynny, yn hytrach na gyrru popeth yn ddwyieithog".