Cyn-gyfarwyddwr Castell Aberteifi yn osgoi cyfnod o garchar

Gwrthododd Jac Davies wneud sylw wrth iddo adael Llys y Goron Abertawe ddydd Iau

Mae cyn-gyfarwyddwr Castell Aberteifi wedi osgoi cyfnod o garchar ar ôl pledio'n euog i gyhuddiadau o dwyll a lladrad.

Cafodd Jac Davies, 34, ei ddedfrydu i 21 mis o garchar, wedi'i ohirio am ddwy flynedd, ar ôl i tua £43,000 fynd ar goll o goffrau'r elusen dros gyfnod o ddwy flynedd.

Cafodd ei ddisgrifio gan y Barnwr Paul Thomas QC fel "dyn cwbl anonest" sydd â'i enw da "yn deilchion", ond roedd wedi dangos "edifeirwch".

Dywedodd y barnwr fod Davies wedi dweud "ar fywyd ei ferch" wrth yr heddlu nad oedd wedi cymryd yr arian dros gyfnod o ddwy flynedd, er bod ei ferch yn yr ysbyty ar y pryd, gweithred a ddisgrifiodd y barnwr fel un "dirmygus".

Roedd Davies eisoes wedi pledio'n euog i ddau gyhuddiad o ddwyn a dau gyhuddiad o dwyll trwy gynrychiolaeth ffug.

£29,000 ar gerdyn credyd y castell

Roedd y drosedd gyntaf yn ymwneud â hawlio am gwrs lletygarwch ar-lein ym mis Rhagfyr 2017 - digwyddiad na fynychodd.

Defnyddiodd dderbynebau twyllodrus i ddangos ei fod wedi gwario dros £4,000 o'i arian ei hun i dalu am yr hyfforddiant.

Fe wnaeth Davies hefyd ddwyn dros £6,000 rhwng Hydref 2018 a Mai 2019, trwy gysylltu ei gyfrif PayPal ei hun â siop ar-lein y Castell.

Cafodd arian ei ddwyn hefyd a ddylai fod wedi cael ei fancio gan Jac Davies.

Cafodd Jac Owen Davies ei benodi i'r swydd ym mis Medi 2017, ond fe adawodd ddwy flynedd wedyn

Defnyddiodd Davies gerdyn credyd y castell hefyd ar gyfer dibenion personol mewn llefydd fel Prime Video, Tesco, y Celtic Manor ac iTunes.

Wrth gael ei holi ynglŷn â hyn ym mis Rhagfyr 2019, dywedodd fod ei gerdyn credyd ei hun rywsut wedi uno â chyfrif busnes y castell.

Parhaodd i ddefnyddio'r cerdyn hefyd ar ôl dweud wrth yr ymddiriedolwyr ei fod wedi'i ddinistrio.

Casglwyd bron i £29,000 ar gerdyn credyd y castell trwy ei drafodion personol ei hun.

Rhybuddiodd Paul Thomas QC y byddai'n cael ei anfon i'r carchar pe bai'n cyflawni troseddau pellach.

Bydd gwrandawiad arall yn cael ei gynnal i benderfynu ar yr union swm y bydd disgwyl i Davies ei dalu'n ôl.

Clywodd y llys ei fod eisoes wedi talu £40,000 yn ôl i'w gyfreithwyr.

Gorchmynnwyd iddo hefyd gwblhau 200 awr o waith di-dâl gwirfoddol a 15 diwrnod o weithgaredd adsefydlu.