Ailagor Stryd Fawr Bangor wedi misoedd o waith

Bu'n rhaid cau rhan o'r stryd wedi tân yn Rhagfyr 2019

Ar ôl bron i 18 mis ers ei chau, bydd rhan o Stryd Fawr Bangor yn ailagor i gerbydau ddydd Mercher.

Fe gaeodd y lôn yn Rhagfyr 2019 ar ôl tân mewn bwyty - digwyddiad a achosodd ddifrod sylweddol i adeilad arall cyfagos.

Wedi i sgaffaldau gael eu codi i sefydlogi'r adeilad yn ystod y cyfnod hwn, gan rwystro'r lôn i gerbydau, fe wnaeth nifer o fusnesau gwyno eu bod wedi dioddef colledion ariannol.

Roedd yna bryderon bod rhai siopwyr yn cadw draw a bod eraill ddim yn sylwi bod y siopau ar agor.

Mae Cyngor Gwynedd wedi "diolch i drigolion a masnachwyr am eu hamynedd".

Mae'r ffordd bellach wedi ailagor er bod y gwaith adeiladu'n parhau

Yn ôl rhai perchnogion busnes dim ond "pedwar mis" oedd y lôn fod ynghau yn wreiddiol.

Ond oherwydd natur gymhleth y tân, y difrod ac effaith y pandemig, fe ddaeth hi i'r amlwg y byddai'r lôn ar gau am gyfnod llawer hirach - ac roedd siopau ar ben stryd fawr hiraf Cymru yn gweld y cyfan yn anodd.

Oedi 'dychrynllyd'

Mae Carys Davies yn berchen ar siop ddillad So Chic ac wrth i'r ffordd agor ddydd Mercher, mae hi'n dweud fod y flwyddyn ddiwethaf wedi bod yn "anodd iawn".

"Dydy'r traffig heb allu dod i fyny," meddai.

"Dydy pobl ddim wedi gweld hi'n rhwydd dod fyny - yn enwedig pan oedd sgaffaldau mawr fyny. Oedd o fel rhwystr a phrin oedd y ffordd gerdded.

"Mi oedd hi'n reit dawel yn gyffredinol ar y stryd."

Mae cau rhan o'r lôn wedi gwneud hi'n anodd i siopau a busnesau cyfagos dderbyn cyflenwadau

Wrth drafod yr oedi i'r gwaith dros gyfnod y pandemig, mae Ms Davies yn ychwanegu fod y rhwystrau wedi bod yn "ddychrynllyd".

"Mae'r oedi wedi bod bron yn annioddefol," meddai.

"Mae o mor rhwystredig ar ôl yr holl fisoedd o fod wedi cau a dod 'nôl a dim byd wedi ei wneud, mi oedd hynny really yn drawiad i fod yn onest."

'Mae 'na obaith - hwre!'

Ond gyda'r gwaith bellach wedi dod i ben a Chyngor Gwynedd yn ailagor y ffordd fore Mercher, mae hi'n dweud y bydd yna "wahaniaeth mawr".

"Mae 'na obaith - hwre!" meddai.

"Mi fydd yna wahaniaeth mawr - nid yn unig i fy musnes i ond i fusnesau eraill. Mae 'di bod yn anodd iawn o ran deliveries a phobl methu dod yn agos at y siop.

"Fydd gweld trafnidiaeth yn dod heibio a phobl yn troedio - wel mi fydd hynny'n bleser."

"Dwi'n siŵr ei fod o'n andros o ryddhad i tua'r 70 o fusnesau, bach lleol," meddai'r cynghorydd Catrin Wagner

Mae'r lôn wedi bod ar agor i siopwyr ar droed ac er i faner enfawr ar y sgaffaldau ei gwneud hi'n glir fod dros 70 o fusnesau yno yn parhau i fasnachu, mae nifer yn dweud fod y gwaith ynghyd â'r pandemig wedi gwneud y flwyddyn ddiwethaf yn anodd iawn.

Mewn datganiadau blaenorol mae Cyngor Gwynedd wedi mynegi "siom" am yr oedi ac wedi ystyried "camau gorfodaeth".

'Proses eithriadol o gymhleth'

"Dwi'n llwyr cydymdeimlo efo'r busnesau ac mae'n bwysig ein bod ni'n cefnogi nhw rŵan," meddai Catrin Wager, cynghorydd lleol, ar raglen Dros Frecwast.

"Ma'i 'di bod yn broses eithriadol o gymhleth yn dechnegol ac yn gyfreithiol a ma'i 'di bod yn brosiect anodd iawn.

"Pob tro oedd o'n symud mlaen o'dd 'na her eto.

"Oedd angen craen mawr - 200 tunnell - ond oedd angen hefyd atgyfnerthu'r lôn a hynny'n dangos mawredd y gwaith. Ond diolch rŵan bod o ar agor."

Ddydd Mercher fe ddywedodd Dafydd Wyn Williams, Pennaeth Adran Amgylchedd Cyngor Gwynedd ei fod yn falch bod y lôn yn ailagor.

"Hoffwn ddiolch yn enfawr i drigolion a masnachwyr lleol am eu hamynedd a'u dealltwriaeth trwy gydol y cyfnod anodd hwn ynglŷn â'r sefyllfa parthed 164 a 166 Stryd Fawr, Bangor," meddai.

"Hoffwn hefyd estyn fy niolch i gwmni peirianwyr EWP a'r holl bartneriaid a fu'n rhan o'r gwaith cymhleth yma."