'Anafiadau i'w ben a'i wddf' wedi lladd bachgen 10 oed

Bu farw Jack Lis o'i anafiadau wedi'r ymosodiad

Mae cwest wedi clywed fod bachgen 10 oed wedi marw o "anafiadau difrifol i'w ben a'i wddf" ar ôl i gi ymosod arno yng Nghaerffili.

Bu farw Jack Lis o'i anafiadau wedi'r ymosodiad ym Mhentwyn, Penyrheol toc cyn 16:00 ar 8 Tachwedd.

Clywodd y cwest yn Llys y Crwner Casnewydd fod Jack yn chwarae gyda ffrind tu allan i'w gartref, a'i fod wedyn wedi mynd i dŷ'r ffrind.

Dywedodd y crwner Caroline Saunders fod y ci wedi ymosod ar Jack wrth iddo fynd i mewn.

'Yn ein calonnau am byth'

Mae teulu Jack wedi cyhoeddi teyrnged iddo gan ddweud: "Rydym wedi torri'n calonnau. Fydd ein bywydau fyth yr un fath heb Jack.

"Nid yw hyn yn rhywbeth y dylai unrhyw rhiant orfod ysgrifennu.

"Mae gennym cymaint o bethau yr ydym am ddweud am ein bachgen prydferth, ond dydyn nhw ddim yn ddigonol.

"Rydym yn ei garu fwy na all geiriau ddisgrifio. Fe'n gwnaeth ni y rheini a theulu mwyaf balch ar y blaned.

"Bydd yn ein calonnau am byth. Cwsg yn dawel Jack, ein mab perffaith."

Mae BBC Cymru'n deall mai ci o'r enw Beast (chwith) oedd yn gyfrifol am yr ymosodiad

Clywodd y llys fod parafeddygon wedi eu galw, ond nad oedd modd iddo oroesi ei anafiadau ac fe gafodd ei gyhoeddi'r farw am 16:14.

Ychwanegodd y crwner bod amgylchiadau marwolaeth Jack yn "dreisgar ac annaturiol" ac felly fe agorodd gwest ffurfiol i'r farwolaeth.

Yna fe ohiriodd y cwest er mwyn i "ymchwiliadau pellach" ddigwydd.

Bydd y cwest yn ailagor ar ddyddiau eto i'w bennu.

Mae blodau wedi'u gadael ger y fan y bu farw Jack Lis

Mae BBC Cymru'n deall fod y ci, o'r enw Beast, wedi bod yn cael ei gadw mewn cartref yn Aberpennar nes deuddydd cyn yr ymosodiad.

Y gred yw mai Lee Jenkins, 34, oedd yn arfer bod yn berchen ar y ci, a'i fod wedi mynychu cyfweliad gyda'r heddlu o'i wirfodd ddydd Mercher.

Mae Mr Jenkins wedi gwadu bod yn berchen ar Beast, gan ddweud: "Nid fi ydy perchennog y ci 'na. Fe ddywedais i bopeth rwy'n gwybod i'r heddlu. Maen nhw'n gwybod nad oes gen i unrhyw beth i wneud â'r peth.

"Dim fy nghi i yw e ac roedd e wedi cael cartref newydd."

Dywedodd cymydog i Mr Jenkins wrth BBC Cymru fod Beast yn cael ei ddefnyddio ar gyfer bridio, a'i fod wedi cael o leiaf 10 ci bach gyda chi arall Mr Jenkins, Beauty.

Ar 29 Hydref fe wnaeth Mr Jenkins roi hysbyseb ar Facebook yn ceisio cael cartref newydd i Beast, gan ddweud ei fod yn "grêt gyda phobl" ond "nid yw'n hoffi cŵn eraill o gwbl".

Cafodd y ci ei ddifa yn dilyn y digwyddiad.