Dyn wedi ceisio dinistrio Banksy a'i atal rhag gadael Cymru

Fe ymddangosodd gwaith Banksy ar ochr garej ym Mhort Talbot ym mis Rhagfyr 2018

Mae dyn wedi cael dirwy am geisio dinistrio gwaith celf enwog Banksy er mwyn ei atal rhag gadael Cymru.

Ceisiodd Michael Thomas, 42, dorri ei ffordd i mewn i adeilad i chwistrellu'r gwaith celf gwerth £500,000 gyda phaent gwyn.

Ond galwodd cymdogion yr heddlu ar ôl ei glywed yn torri ffenestr am 05:30. Ni chafodd y gwaith celf ei ddifrodi.

Dywedodd Thomas ei fod yn ddig bod y celfwaith - a ddaeth i'r amlwg ym Mhort Talbot yn 2018 - wedi'i werthu i gasglwr yn Llundain.

Cafodd Thomas, o Bort Talbot, ddedfryd o garchar o 14 mis wedi'i ohirio am ddwy flynedd ar ôl cyfaddef i ddifrod troseddol a cheisio byrgleriaeth.

'Gan ryw ddyn cyfoethog'

Dywedodd yr erlynydd Sian Cotter: "Clywodd tystion ef yn dweud: 'Dyma'r unig beth ym Mhort Talbot ac maen nhw'n ei gymryd i ffwrdd'.

"Roedd Thomas yn bwriadu dinistrio'r paentiad fel na allai neb arall ei gael.

"Clywodd cwpl a'u plentyn pum mlwydd oed y diffynnydd yn gweiddi: 'Maen nhw'n ei gymryd i ffwrdd, mae gan ryw ddyn cyfoethog.'"

• £120,000 i ddiogelu Banksy Port Talbot

• Casglwr yn cynnig £100,000 am waith Banksy

Clywodd Llys y Goron Abertawe fod y paentiad o fachgen yn mwynhau eira wrth ymyl sled yn cael ei brisio ar £500,000.

Cododd Cyngor Port Talbot strwythur dros dro o amgylch y Banksy ar ôl iddo ymddangos ar ochr garej yn ardal Taibach dros dair blynedd yn ôl.

Dywedodd Ms Cotter: "Galwodd Thomas yr heddlu i ddweud ei fod wedi cyflawni'r difrod mewn dicter oherwydd nad oedd am i'r paentiad adael Port Talbot.

"Dywedodd fod y gwaith yn cael ei symud i Loegr ac fe wnaeth hynny ei ddigio ac felly penderfynodd ei ddinistrio."

Dywedodd Jonathan Tarrant, ar ran yr amddiffyn, ei fod yn fwy o brotest na gweithred o fwriad troseddol a'i bod yn annhebygol y byddai Thomas yn aildroseddu.

Bwriad Banksy

Dywedodd y Barnwr Geraint Walters wrtho: "Roedd bwriad i symud gwaith celf Banksy allan o Bort Talbot i ardal Llundain a gwnaeth hynny eich gwylltio.

"Efallai'n wir nad oedd hi'n fwriad gan Banksy y dylai'r paentiad fyth adael Port Talbot."

Ychwanegodd: "Y realiti masnachol yw ei fod yn waith celf o werth mawr ac erbyn hyn mae mewn perchnogaeth breifat."

Gorchmynnwyd i Thomas dalu iawndal o £1,058 a bydd yn rhaid iddo wisgo tag electronig am 12 wythnos.