Bargen Twf Canolbarth: Hwb swyddi ond rhybudd am 'waith caled'

Bydd arian y cytundeb yn mynd tuag at greu swyddi ym meysydd fel amaeth, bwyd a diod a thwristiaeth

Mae cynllun a allai gyflwyno dros fil o swyddi i'r canolbarth wedi ei lofnodi gan Lywodraeth Cymru, ond mae rhybudd bod "gwaith caled" i'w wneud er mwyn gweithredu'r fargen.

Mae Bargen Twf Canolbarth Cymru yn swm o £110m i roi hwb i ardaloedd yng Ngheredigion a Phowys.

Gallai rhwng 1,100 a 1,400 o swyddi newydd eu creu erbyn 2030.

Bydd yr arian yn mynd at sectorau digidol, twristiaeth, amaethyddiaeth, bwyd a diod, ymchwil ac arloesedd.

Mae gweinidogion o Lywodraethau Cymru a San Steffan wedi ymrwymo i ddarparu hanner yr arian cychwynnol ar gyfer y fargen.

• Angen cytundeb twf canolbarth 'trawsnewidiol'

• Trafod cytundeb twf i ganolbarth Cymru

Mewn datganiad ar y cyd, dywedodd arweinydd cyngor Ceredigion Ellen ap Gwynn ac arweinydd cyngor Powys, Rosemarie Harris: "Gyda'n gilydd, rydym yn edrych ymlaen at weld y manteision y bydd y buddsoddiad pwysig hwn yn eu cynnig i bobl a busnesau ledled Canolbarth Cymru.

"Mae rhywfaint o waith caled o'n blaenau eto i sicrhau bod y buddsoddiad hwn yn gwneud gwahaniaeth i'n cymunedau.

"Fodd bynnag, rydym wedi buddsoddi amser ac ymdrech ac mae gennym dîm ar waith i helpu i symud hyn yn ei flaen."

Cafodd y cytundeb ei lofnodi ddydd Iau

Dywedodd gweinidog Llywodraeth San Steffan, David TC Davies: "Mae gan y Fargen hon y pŵer i drawsnewid bywoliaethau, creu swyddi a lledaenu ffyniant ac rwy'n falch iawn o'i lofnodi heddiw.

"Edrychaf ymlaen at weld buddion diriaethol cytundeb heddiw yn y misoedd a'r blynyddoedd i ddod."

Ychwanegodd Gweinidog Economi Llywodraeth Cymru, Vaughan Gething: "Mae hwn yn gam mawr ymlaen i'r rhanbarth ac mae'n bwysig bod momentwm yn cael ei gynnal fel y gall y rhanbarth symud ymlaen tuag at gyflawni'r Fargen."