Naw mlynedd o garchar am ddynladdiad dyn o Aberdâr

Roedd Daniel Howells-Thomas wedi pledio'n euog i ddynladdiad

Mae dyn wedi'i ddedfrydu i naw mlynedd o garchar ar ôl cyfaddef iddo ladd dyn 21 oed, oedd ar fin dod yn dad.

Bu farw Keyron Curtis, o Gwmdâr, yn dilyn ymosodiad yn ardal Penywaun, Aberdâr ar 17 Hydref y llynedd.

Roedd Daniel Howells-Thomas, 24, wedi pledio'n euog i ddynladdiad ac o ymosod ar ddyn arall ar yr un noson.

Clywodd Llys y Goron Merthyr Tudful fod Mr Curtis wedi meddwi ac yn cael ei helpu fewn i gar gan ffrind pan ymosododd Howells-Thomas ar y ddau.

Bu farw Mr Curtis, oedd wedi derbyn anaf sylweddol ar ôl cael ei ddyrnu a tharo'i ben ar y llawr, tu allan i'r Colliers Arms ym Mhenywaun.

Gyda llygad dystion yn dweud fod Howells-Thomas yn ymosodol ac yn chwilio am wrthdaro, clywodd y llys nad oedd gan Mr Curtis gyfle i amddiffyn ei hun.

Er derbyn triniaeth gan barafeddygon, ni ddoth ato'i hun a bu farw yn yr ysbyty.

Cafodd ei ferch, Hope, ei geni bythefnos yn ddiweddarach.

'Byth yn adnabod ei thad'

Disgrifiwyd Mr Curtis fel dyn "meddylgar a gofalgar," gyda'i organau wedi'i rhoi i achub bywydau pedwar o bobl eraill.

Darllenwyd datganiad hefyd ar ran ei bartner, oedd wedi llwyddo i gyrraedd y digwyddiad a dal llaw Mr Curtis wrth iddo farw.

Cafodd merch Keyron Curtis ei geni bythefnos ar ôl ei farwolaeth

"Yr hyn sy'n fy mrifo fwyaf yw na fydd ein merch byth yn profi cofleidiad cariadus ei thad," meddai.

Clywodd y llys fod gan Howells-Thomas euogfarnau blaenorol am drais, gan gynnwys dau ymosodiad tebyg mewn tafarndai yn Aberdâr lle dorrodd ên dyn.

Yn ei amddiffyn, dywedodd Lucy Crowther: "Mae'n teimlo bod yn rhaid iddo gael ei gosbi'n iawn am yr hyn y mae wedi'i wneud.

"Mae ganddo gywilydd mawr."

Wrth ei ddedfrydu i naw mlynedd am ddynladdiad, i gydredeg gyda thri mis ychwanegol am yr ymosodiad cynharach, dywedodd y Barnwr Walters na allai unrhyw ddedfryd wneud yn iawn am y golled i'r teulu.