3 Llun: Lluniau pwysicaf bywyd Alun Elidyr

Os fyddai rhaid i chi ddewis 3 llun sydd yn cynrychioli eich bywyd chi, pa luniau fydden nhw?

Yr actor, cyflwynydd a'r amaethwr Alun Elidyr sydd yn rhannu ei hoff dri llun.

Ym 1988, yn Steddfod Casnewydd, ond ar lwyfan y Chapter yng Nghaerdydd, mi ges i'r fraint o berfformio Hamlet gyda chwmni Theatrig. Roedd yn oes aur theatr yng Nghymru, ond pan edrychaf yn ôl mae'n teimlo fel bywyd rhywun arall, er i mi gael gyrfa brysur, amrywiol a llwyddiannus fel actor.

Mae diwrnod cneifio'r defaid mynydd yn uchafbwynt o ran cywaith ymysg y gymdogaeth, ac yn y llun o achlysur 2020, darlunnir yr holl elfennau ar gyfer diwrnod llwyddiannus.

Mike Caellwyd symudodd o Fanceinion a dysgodd Gymraeg i'n parchu, Kevin Dolfeili a'i gŵn gwych i hel, Gwion y boi tawel yn y gorlan, Emlyn a'i fab Daf, a Huw Ynyr a'i dad, Huw Al yn gneifiwr o fri, Elan fy merch yn y gwlân a fi efo Gwen yr ast ffyddlon a Catrin tu ôl y lens. Cymuned wledig ar ei orau ar ddiwrnod braf eithriadol ganol Gorffennaf.

Dwi'n genfigennus o blant ffarm sy'n cael y cyfle i gydweithio adre ar y ffarm gyda'u tadau, gan i mi golli dad pan oedd e'n 67 ifanc.

Yng nghornel fy waled dwi wastad yn cario llun ohono, ynghyd a chasgliad o luniau passport ohonof innau'n iau. Mae hanes bywyd a natur fy nhad yn eglur i'w ddarllen ar ei wyneb a minnau mor blaen o'i gymharu!

Mae 'ngwyneb innau'n cario creithiau bywyd erbyn heddiw, ond llun at rywbryd eto ydi hwnnw!