Mayhill: Tri yn eu harddegau'n pledio'n euog i derfysg

Roedd Ffordd Waun-wen yn edrych fel "maes y gad" medd rhai trigolion

Mae tri pherson ifanc wedi pledio'n euog i gyhuddiad o derfysg yn dilyn anhrefn yn ardal Mayhill, Abertawe y llynedd.

Mae'r tri, sydd i gyd yn 17 oed ond na ellir eu henwi oherwydd eu hoed, wedi'u rhyddhau ar fechnïaeth tan wrandawiad pellach fis Mehefin.

Cyn ymddangos o flaen Llys y Goron Abertawe fore Iau, roedd y tri wedi gwadu'r cyhuddiad.

Bydd pedwerydd diffynnydd, oedd hefyd i fod i ymddangos, yn dychwelyd i'r llys yn hwyrach yn y mis.

Achoswyd gwerth miloedd o bunnoedd o ddifrod yn dilyn y terfysg yn ardal Mayhill

Mae 27 o bobl wedi'u cyhuddo mewn cysylltiad â'r anrhefn ar Ffordd Waun-wen, Mayhill, fis Mai 2021.

Mae tri pherson yn eu harddegau eisoes wedi'u dedfrydu am eu rhan, gydag wyth a blediodd yn euog ddydd Mercher i gael eu dedfrydu maes o law.

Mae disgwyl i naw arall ymddangos yn y llys ddydd Gwener.