Phil Bennett: Dadorchuddio cerflun i un o sêr rygbi mwyaf Cymru

y cerflun o phil bennettBILL THOMAS

Cododd y gymuned £7,500 tuag at greu a gosod y cerflun yn ei le

Mae cerflun wedi ei ddadorchuddio yn mhentre Felinfoel i dalu teyrnged i un o feibion y pentref ac un o'r sêr mwyaf yn hanes rygbi Cymru a'r byd.

Dim ond 29 o weithiau y chwaraeodd Phil Bennett dros Gymru, ac wyth o weithiau dros y Llewod, ond mae'n cael ei gyfrif yn un o'r maswyr gorau erioed.

Cafodd gwmni rhai o'i gyd-chwaraewyr gyda Chymru a'r Llewod yn ogystal â rhai o garfan bresennol y Scarlets wrth i'r cerflun gael ei ddadorchuddio.

Breuddwyd ysgrifennydd clwb rygbi Felinfoel, Clive Richards oedd creu'r cerflun, er mwyn dangos i Phil Bennett gymaint mae pobl yr ardal yn feddwl ohono.

"Ro'n i'n siarad â ffrind i mi ryw chwe mis yn ôl a mi ddechreuon ni siarad am Phil Bennett, am yr oll mae e wedi gyflawni a mi benderfynon ni wneud rhywbeth i gofio amdano yn barhaol," meddai.

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Scarlets Rugby

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol
Phil Bennett (dde) a'i gyn-gapten yn nhim Llanelli, Delme Thomas, yn y seremoni ddadorchuddioBill Thomas

Phil Bennett (dde) a'i gyn-gapten yn nhîm Llanelli, Delme Thomas, yn y seremoni ddadorchuddio ddydd Iau

"Aethon ni lawr i weld y cerflunydd, Simon Hedger a wedyn mynd ati i godi'r arian.

"Mae Phil Bennett yn arwr, ac yn llysgennad rygbi Cymru ac mi oedden ni am ddangos be mae'r gymuned yn feddwl ohono."

Mae'r cerflun wedi ei gerfio o bren, gyda'r maswr byd enwog yn cael ei gynnal gan ddraig a llew, i gynrychioli Cymru a'r Llewod.

Costiodd y cerflun tua £7,500 i'w greu a'i osod - arian a gasglwyd gan y gymuned, i ddangos eu gwerthfawrogiad.

Phil Bennett yn 1077Rex Features

Phil Bennett yng nghrys coch Cymru

"Rodd y seremoni yn eitha emosiynol," meddai Clive Richards, "ac mi ddywedodd Phil ryw air neu ddau i ddiolch ac roedd e yn emosiynol hefyd."

Roedd ei blant, ei wyrion a'i deulu i gyd yno, yn ogystal â Ken Owens a Jonathan Davies o dim presennol y Scarlets, a Delme Thomas a Roy Bergiers - dau o'i gyd-chwaraewyr yn nhîm Llanelli a drechodd y Crysau Duon o 9-3 yn 1972.

"Mae Phil wedi rhoi cymaint i'r pentre ac rodd e'n dweud yn glir [yn ystod y seremoni dadorchuddio] fod e wedi chwarae cwpwl o gemau i Felinfoel hefyd.

"Ro'dd yn fraint ac yn anrhydedd i fod yno."

Pynciau cysylltiedig

Straeon perthnasol