Ateb y Galw: Malan Fon
- Cyhoeddwyd
Malan Fon
Y cerddor Malan Fon Jones o Gaernarfon sydd yn ateb y galw yr wythnos yma ar ôl cael ei enwebu gan Yws Gwynedd. Mae Malan wedi dod yn adnabyddus gyda chaneuon fel Busy Bee a Strawberry a mi fuodd yn chwarae yn Ngŵyl 6 Music eleni.
Beth ydi dy atgof cyntaf?
Dwi'n cofio deffro bora 'Dolig, a'r unig beth o'n i wedi gofyn wrth Sion Corn amdano oedd scriws. Dwi'n cofio bod wrth fy modd pan nes i agor y bocs! (rhei plastig oeddan nhw wrth gwrs - dwi'm yn meddwl 'sa fo di bod yn syniad da i roi scriws go iawn i fi oed yna).
Dy hoff le yng Nghymru a pham?
Llanberis - dwi wastad yn ymlacio pan dwi'n mynd yno!
Y noson orau i ti ei chael erioed?
Y noson nes i chwarae yng Ngŵyl Radio 6 yn Gaerdydd - profiad anhygoel!
Bu Malan yn chwarae yng Nghŵyl BBC 6 Music eleni
Disgrifia dy hun mewn tri gair...
Cerddorol, cariadus a stressed!!
Pa ddigwyddiad yn dy fywyd sy' o hyd yn neud i ti wenu neu chwerthin pan ti'n meddwl nôl?
Unrhyw atgof o fod yng Ngŵyl y Dyn Gwyrdd blwyddyn dwytha (2021) - penwythnos gora 'rioed!
O archif Ateb y Galw:
Beth oedd y digwyddiad a gododd y mwya' o gywilydd arnat ti erioed?
Disgyn ac agor fy mhen ar noson allan ha' dwytha - oedd gorfod cerdded o gwmpas gyda chlais mawr ar fy mhen am wythnosau yn rili embarassing!
Pryd oedd y tro diwethaf i ti grïo?
Neithiwr - nes i wylio fideo trist!
Oes gen ti unrhyw arferion drwg?
Pigo ar fy mysedd tan eu bod yn gwaedu - ddim yn arferiad da o gwbl!
Beth yw dy hoff lyfr, ffilm neu bodlediad a pham?
Podlediad 'Same But Different' gan Keelin Moncrieff.
Byw neu farw, gyda phwy fyddet ti'n cael diod. Pam?
Aretha Franklin - dwi'n meddwl y bysa hi'n berson diddorol iawn i gael sgwrs efo.
Dyweda rywbeth amdanat ti dy hun nad oes yna lawer o bobl yn ei wybod
Fi oedd llais y cymeriad 'Mali' yn y cartŵn 'Ben a Mali a'u Byd Bach o Hyd'.
Ben a Mali a'u Byd Bach o Hyd
Ar dy ddiwrnod olaf ar y blaned, beth fyddet ti'n ei wneud?
Cael parti mawr efo fy holl ffrindiau a fy nheulu.
Pa lun sy'n bwysig i ti a pham?
Unrhyw lun o fy nghi - Elsi Mai :).
Elsi Mai
Petaset ti'n gallu bod yn rhywun arall am ddiwrnod, pwy fyddai ef/hi?
Cleo Sol - fy hoff artist i yn y byd!