Tri dyn arall yn pledio'n euog i derfysg Mayhill

Roedd Ffordd Waun-wen yn edrych fel "maes y gad" medd rhai trigolion

Mae tri dyn arall wedi cyfaddef i gymryd rhan yn yr anrhefn yn ardal Mayhill yn Abertawe fis Mai y llynedd.

Roedd disgwyl i Lewis James, Connor Beddows ac Aaron Phillips sefyll eu prawf ddydd Mawrth, ond cyn i'r achos ddechrau fe newidiodd y tri eu ple.

Fe gafodd ceir eu llosgi, ffenestri eu chwalu a phlismyn eu brifo yn dilyn yr anhrefn ar Heol Waun Wen yn ardal Mayhill y ddinas yn 2021.

Daeth wedi i wylnos i fachgen ifanc droi'n dreisgar.

Bydd dyn arall, Kye Dennis, o Fforest Fach, yn sefyll ei brawf yr wythnos nesaf. Mae'n gwadu cyhuddiad o derfysg.

Cafodd tân ei gynnau mewn car a chafodd ffenestri eu torri ar 20 Mai, 2021

Fe gafodd Lewis James o Farina Abertawe, Connor Beddows o Townhill ac Aaron Phillips o Waunarlwydd, eu rhyddhau ar fechnïaeth.

Byddan nhw'n cael eu dedfrydu ynghyd â 15 o oedolion eraill wedi i achos llys Mr Dennis ddod i ben.

Mae disgwyl i'w achos gychwyn ddydd Mawrth nesaf, ond mae ansicrwydd ynglŷn â'r dyddiad, oherwydd gweithredu diwydiannol gan fargyfreithwyr.