Dioddefwr yn croesawu ymddiheuriad cenhadaeth am gam-drin

Cafodd Mark Murray o Lanelwy ei gam-drin gan offeiriad mewn coleg hyfforddi yn Sir Gorllewin Efrog yn y 60au a'r 70au

Mae dyn o'r gogledd a gafodd ei gam-drin yn rhywiol mewn coleg hyfforddi i offeiriaid pan yn blentyn wedi croesawu ymddiheuriad gan genhadaeth Gatholig.

Roedd Mark Murray o Lanelwy, Sir Ddinbych yn un o nifer o ddioddefwyr fu'n cyfarfod ag Urdd y Comboni yn Llundain ddydd Mawrth.

Cafodd Mr Murray, 66, ei gam-drin gan offeiriad yng Ngholeg Sant Peter Claver ym Mirfield, Sir Gorllewin Efrog yn yr 1960au a'r 70au.

Dywedodd Mr Murray fod ymddiheuriad Urdd y Comboni wedi mynd ymhellach na'r disgwyl.

Cafodd Grŵp Dioddefwyr y Comboni wahoddiad i gwrdd ag Archesgob Westminster ac uwch glerigwyr eraill - gan gynnwys aelodau Urdd y Comboni - yn Llundain ddydd Mawrth.

Cafodd Coleg Sant Peter Claver ym Mirfield ei gau yn 1984

"Roedd yn llawer mwy positif na'r hyn ro'n i wedi dychmygu y byddai," meddai Mr Murray.

"Fe wnaethon nhw gydnabod y cam-drin, sy'n rhywbeth roedden ni wastad eisiau."

Roedd y Pab Francis wedi annog Urdd y Comboni i gwrdd â'r grŵp o ddioddefwyr yn dilyn cyfarfod preifat gydag ef.

'Erfyn am faddeuant'

Dywedodd Mr Murray fod yr Urdd wedi gwrando ar alwad y Pab a mynd ymhellach na gwneud ymddiheuriad syml.

"Fe wnaethon nhw erfyn arnom ni am faddeuant. Doeddwn i ddim yn disgwyl iddo fod mor ddiffuant ag oedd o," meddai.

"Mae'n gam dramatig ymlaen yn ein hadferiad."

Roedd y grŵp o ddioddefwyr wedi teithio i'r Fatican i rannu eu hanes gyda'r Pab Francis

Yn 2014 cytunodd Urdd y Comboni i dalu £120,000 o iawndal i 11 o ddynion a gafodd eu cam-drin yn y 60au a 70au, gyda Mr Murray yn un o'r rhain.

Fe wnaeth y dynion hefyd dderbyn ymddiheuriad gan Esgob Leeds wedi iddynt rannu eu hanes gyda'r Pab.

'Ymddiheuro'n ddiffuant'

Yn ymateb ar ran Urdd y Comboni dywedodd y Tra Pharchedig Tesfaye Tadesse eu bod yn "ymddiheuro'n ddiffuant i bob unigolyn wnaeth ddioddef camdriniaeth gan y rheiny oedd yn gyfrifol am eu lles, eu diogelwch a'u haddysg yng Ngholeg Sant Peter Claver".

"Rwy'n ymestyn yr ymddiheuriad yma i deuluoedd ac anwylion sydd wedi dioddef hefyd. Ry'n ni'n edifar fod camgymeriadau wedi'u gwneud dros y blynyddoedd."

Ychwanegodd ei fod yn gobeithio fod yr ymddiheuriad yma yn "dangos ein hawydd diffuant" i gydnabod yr effaith ddinistriol mae'r cam-drin wedi'i gael ar y dioddefwyr.

Dywedodd y grŵp dioddefwyr y byddant yn parhau i gwrdd ag Urdd y Comboni dros y misoedd nesaf.

Yn ôl Mr Murray mae hynny'n allweddol er mwyn sicrhau eu bod nid yn unig yn cydnabod camgymeriadau'r gorffennol ond yn ei atal rhag digwydd eto hefyd.