'Angen rhywbeth i ddifyrru pobl ifanc Y Bala'

Mae 'na alw i sefydlu parc sglefrio a golff gwyllt yn Y Bala er mwyn i bobl ifanc gael rhywbeth i'w wneud.

Daw'r apêl gan Marie Kirkman, sy'n rhedeg gardd gymunedol yn y dref, ble mae disgyblion Ysgol Godre'r Berwyn yn mynd ati'n wythnosol i ddysgu am arddio o bob math.

Mae hi'n credu y byddai'r grîn yng nghanol y dref yn lle delfrydol ar gyfer adnoddau o'r fath.

Dywedodd cynghorydd lleol bod angen ystyried a oes modd gwireddu syniadau sydd wedi eu hawgrymu gan bobl ifanc lleol.

Mae pobl ifanc yn gwerthfawrogi treulio amser yn yr ardd gymunedol ond mae angen mwy i'w difyrru yn y dref, medd Marie Kirkman

Fe amlinellodd Ms Kirkman yr hyn y mae'n gobeithio amdano yn ystod sesiwn wythnosol y disgyblion yn yr ardd gymunedol.

Cafodd yr ardd ei sefydlu, meddai, "achos mae bywyd wedi mynd yn galed" ac awydd i "helpu pobl i gael bwyd am ddim".

"Dwi isio tyfu pethe yma i bobl gael bwyta trwy'r gaeaf, haf… beth bynnag," ychwanegodd.

Mae Jac yn gwerthfawrogi'r cyfleoedd i helpu gwella'r gymuned

Mae disgyblion Ysgol Godre'r Berwyn wrth eu boddau efo'r wers wythnosol.

Dywedodd Jac: "Mae hwn jyst yn siawns i ni wella'r gymuned a hefyd mae o'n rhan o'n gwaith BAC ni hefyd.

"Dydi o ddim jyst yn helpu efo graddau - mae'n helpu'r gymuned i gael lle gwell i chillio.

"Den ni yn dysgu llawer o sgiliau newydd gan gynnwys gosod lawr llwybrau a mae 'na dipyn o grwpiau gwahanol hefyd - rhai yn peintio, gosod llwybrau… pob peth rili."

Rhan o dir y grîn yn Y Bala sy'n cael ei awgrymu fel lleoliad posib ar gyfer parc sglefrfyrddio

Ond mae Marie Kirkman yn credu bod angen mwy o bethau yn ardal Y Bala i ddifyrru pobl ifanc lleol, ac y byddai safle'r grîn yn le da i'w sefydlu.

Ei gobaith yw cael "rhyw skatepark a gobeithio crazy golf i deuluoedd hefyd i gael ei ddefnyddio yn y dyfodol".

Mae hi'n dadlau "does 'na ddim byd iddyn nhw - y [plant oedran] 13 plus - yn y dref" ac y byddai cyfleusterau o'r fath yn rhoi "rhywbeth iddyn nhw wneud".

Rhaid teithio i Ruthun neu Gorwen ar gyfer rhai gweithgareddau hamdden, medd Osian

Mae disgyblion Ysgol Godre'r Berwyn o blaid y syniad.

Dywedodd Osian: "Dwi'n meddwl bod o'n syniad da i blant bach allu cael y siawns i wneud pethau tu allan a gallu mynd ar beiciau nhw neu skateboardio, yn lle teithio i Ruthun neu Corwen."

Mae'r Cynghorydd Dilwyn Morgan, sy'n cynrychioli'r Bala ar Gyngor Gwynedd, yn gefnogol iawn i'r syniadau sydd wedi dod o'r gymuned.

'Rhaid mynd ati' i wireddu syniadau pobl ifanc yr ardal, medd y Cynghorydd Dilwyn Morgan

"Beth sydd yn dda am gynlluniau fel hyn [ydi] bod o'n dod gan y bobl ifanc yn y gymuned," meddai.

"Bydd rhaid i ni fynd ati rŵan i'w cefnogi nhw - mae 'na alw rŵan yn does.

"Y cam cyntaf fydd edrych oes 'na dir ar gael a gweld sut mae mynd ati i godi arian ac yn y blaen.

"[Rhaid ystyried] cefnogi y bobl ifanc… eu cynllun nhw ydi o a dyna sy'n bwysig i mi."