Adwaith yn ennill Gwobr Gerddoriaeth Gymreig 2022

Adwaith yw Heledd Owen, Holly Singer a Gwenllian Anthony

Mae Adwaith wedi cael eu cyhoeddi fel enillwyr Gwobr Gerddoriaeth Gymreig 2022 mewn seremoni yng Nghanolfan y Mileniwm yng Nghaerdydd.

Dyma'r ail waith i'r band Cymraeg ennill y wobr, yn dilyn eu llwyddiant gyda'u halbwm gyntaf - Melyn - yn 2019.

Penderfynodd y beirniaid mai ail albwm y band o Gaerfyrddin - Bato Mato - fyddai'n cipio'r wobr eleni, gan ennill y tlws a gwobr ariannol o £10,000.

Adwaith yw'r unig fand i ennill y wobr ddwywaith ers iddi gael ei sefydlu yn 2011.

Hefyd yn y seremoni cyhoeddwyd mai canwr The Alarm, Mike Peters yw enillydd y Wobr Ysbrydoliaeth am ei gyfraniad i gerddoriaeth Gymreig.

Rhyddhaodd Adwaith eu hail albwm, Bato Mato gyda'u label Libertino ym mis Ebrill 2022

Roedd enwau mawr fel Cate Le Bon, Gwenno a'r Manic Street Preachers hefyd ar y rhestr fer o 15 artist ar gyfer y brif wobr eleni.

Mae enillwyr blaenorol y wobr yn cynnwys Gwenno, Georgia Ruth a Gruff Rhys.

Roedd y seremoni yng Nghanolfan Mileniwm Cymru nos Fercher yn cael ei gyflwyno gan y DJ BBC Radio 1, Sian Eleri.

Roedd y saith o feirniaid eleni yn cynnwys Matt Wilkinson o Apple Music, Sophie Williams o NME a'r newyddiadurwr Tegwen Bruce Deans.

Y rhestr fer yn llawn

• Adwaith - Bato Mato

• Art School Girlfriend - Is It Light Where You Are

• Bryde - Still

• Breichiau Hir - Hir Oes I'r Cof

• Buzzard Buzzard Buzzard - Backhand Deals

• Cate Le Bon - Pompeii

• Carwyn Ellis, Rio 18 a Cherddorfa Genedlaethol Gymreig y BBC - Yn Rio

• Dead Method - Future Femme

• Danielle Lewis - Dreaming In Slow Motion

• Don Leisure - Shaboo Strikes Back

• Gwenno - Tresor

• L E M F R E C K - The Pursuit

• Manic Street Preachers - The Ultra Vivid Lament

• Papur Wal - Amser Mynd Adra

• Sywel Nyw - Deuddeg