Ateb y Galw: Helena O Sullivan
- Cyhoeddwyd
Helena O Sullivan
Bu canlyiad Cymru 10-34 Iwerddon ym Mhencampwriaeth y Chwe Gwlad yn siomedig ddydd Sadwrn. Ond, un oedd wrth ei bodd â'r canlyniad oedd y Wyddeles sy'n byw yng Ngheredigion, Helena O Sullivan.
Helena, sy'n ateb cwestiynau busneslyd Cymru Fyw yr wythnos yma ar ôl cael ei henwebu gan Tegwen Morris.
Beth ydi dy atgof cyntaf?
Cerdded o amgylch caeau'r fferm efo Granda a Dad yn Ballinasig, ger Dingle.
'Fi a Granda'
Dy hoff le yng Nghymru a pham?
Ardal Bontgoch a Tal-y-bont, Gogledd Ceredigion. Pam? Achos dyma lle rydyn ni'n magu ein teulu a lle rydyn ni fel teulu yn galw'n gartre, sydd yn cynnwys Twm, ein cath ni. Mae cymuned a ffrindiau da yma hefyd.
'Twmi'r gath'
Y noson orau i ti ei chael erioed?
14 Hydref 2004. Dyma'r noson gyntaf i mi fod yn fam.
'Y plant, Oisín a Caoihme'
Disgrifia dy hun mewn tri gair.
Trefnus, cymdeithasgar a diamynedd!
Pa ddigwyddiad yn dy fywyd sy' o hyd yn neud i ti wenu neu chwerthin pan ti'n meddwl nôl?
Mynd i'r ysbyty i gael Oisín fy mab. Doeddwn i ddim yn siŵr os byddan nhw'n fy nghadw fi mewn neu'n fy anfon adre ac fe wnes i benderfynu gadael y bag efo'r dillad ar gyfer y babi adre, a mynd efo bag o esgidiau a magasîns Hello! Ond fe wnaeth Oisín benderfynu dod, a dim ond pan wnaeth y fydwraig ddweud y dylen ni dynnu dillad y babi allan i gael ei gynhesu y gwnes i gyfaddef nad oedd gen i ddillad babi wedi eu pacio. Bu raid i fy ngŵr (oedd wedi bod yn cwyno ers oriau ei fod yn gorfod dragio bagiau o esgidiau a chylchgronau merched o un ward i'r llall o gwmpas yr ysbyty) yrru adre i'w nôl!
'Y teulu. Ebrill 2020'
Beth oedd y digwyddiad a gododd y mwya' o gywilydd arnat ti erioed?
Brexit!
Pryd oedd y tro diwethaf i ti grïo?
Wythnos yma, wedi i fam un o fy ffrindiau gorau i o gartre yn Dingle farw.
Oes gen ti unrhyw arferion drwg?
Na sa i'n credu... ond dw i'n hollol siŵr byddai fy ngŵr i a'r plant yn anghytuno. Ond, fi sy'n cael ateb y cwestiynau!
Beth yw dy hoff lyfr, ffilm neu albym a pham?
Mae gyda fi ddwy hoff ffilm Cool Runnings a Pride. Mae'r neges yn y ddwy yn eitha tebyg - peidiwch byth â rhoi'r gorau iddi, a phwysigrwydd cyfeillgarwch.
Byw neu farw, gyda phwy fyddet ti'n cael diod. Pam?
Michael Collins - y chwildroadwr, milwr a'r gwleidydd Gwyddelig. Mae gen i ddiddordeb mawr yn hanes Iwerddon a fe fuodd yn byw yng Nghymru hefyd am sbel, wrth gwrs, pan oedd o'n garcharor yng ngwersyll Frongoch, ger y Bala.
Dyweda rywbeth amdanat ti dy hun nad oes yna lawer o bobl yn ei wybod.
Dwi'n gallu gwneud crochet.
Ar dy ddiwrnod olaf ar y blaned, beth fyddet ti'n ei wneud?
Cael parti enfawr efo fy nheulu a'm ffrindiau.
Pa lun sy'n bwysig i ti a pham?
Dyma lun o'r teulu. Sion y gŵr, Oisín Lludd a Caoimhe Melangell. Fel mae'n digwydd, mewn gêm rygbi - Cymru v Iwerddon. Mae diddordeb gyda'r pedwar ohonom ni mewn chwaraeon amrywiol, ond gall bod helynt weithiau pan fydd Iwerddon v Cymru!
Gwylio Cymru'n chwarae rygbi yn erbyn Iwerddon yn Stadiwm y Principality
Petaset ti'n gallu bod yn rhywun arall am ddiwrnod, pwy fyddai ef/hi?
Neb. Dw i'n hapus i fod yn fi fy hun!
Hefyd o ddiddordeb: