Minffordd: Cadw mab mewn ysbyty ar ôl lladd ei dad

Roedd Dafydd Thomas yn berchen ar gwmni Gwynedd Environmental Waste Service

Bydd mab a gafwyd yn euog o ddynladdiad ei dad ger ei gartref ym Minffordd, Gwynedd, yn cael ei gadw mewn ysbyty am gyfnod amhenodol.

Bu farw Dafydd Thomas, 65, o "anafiadau catastroffig i'w wyneb" ar ôl i'w fab, Tony Thomas, gicio a sathru arno ym mis Mawrth 2021.

Fe glywodd y rheithgor fod gan Tony Thomas, 45, hanes hir o broblemau iechyd meddwl.

Dywedodd y Barnwr yn Llys y Goron Caernarfon fod "natur ofnadwy" yr ymosodiad wedi golygu fod "dyn hynod" wedi ei golli.

• Minffordd: Mab yn euog o ddynladdiad Dafydd Thomas

• Minffordd: Tad 'dal yn fyw' wedi i'w fab ymosod arno

Yn ystod yr achos llys fe ofynnodd y barnwr i'r rheithgor beidio ystyried cyhuddiad o lofruddiaeth yn dilyn tystiolaeth seiciatryddion.

Roedden nhw'n cytuno bod yr achos yn cyrraedd y trothwy o ddynladdiad ar y sail nad oedd yn ei iawn bwyll.

Yn ystod yr achos, clywodd y rheithgor fod gan Tony Thomas hanes o broblemau iechyd meddwl ers 1997, a'i fod wedi cael diagnosis o anhwylder deubegynol (bipolar).

Ym mis Ionawr daeth rheithgor yn Llys y Goron Yr Wyddgrug i'r casgliad unfrydol ei fod yn euog o ddynladdiad ar y sail nad oedd yn ei iawn bwyll.

Roedd Tony Thomas (chwith) wedi gwadu llofruddio ei dad, Dafydd Thomas

Fe ddarllenodd merch Mr Thomas, Elin, ddatganiad yn Llys y Goron Caernarfon gan ddweud fod y "dicter 'dan ni'n deimlo fel teulu yn anfesuradwy".

Roedd Mr Thomas yn ddyn adnabyddus yn y gymuned a newydd ymddeol ar ôl sefydlu busnes gwastraff Gwynedd Environmental Waste Company.

"'Dan ni'n deulu agos," dywedodd ei ferch, "alla i ddim disgrifio'r golled 'dan ni'n ei deimlo o beidio gallu ei weld bob dydd.

"Mae'n fwlch na chaiff fyth ei lenwi."

'Dal yn droseddwr peryglus'

Wrth ddedfrydu Thomas fore Gwener, dywedodd y Barnwr Rhys Rowlands ei fod wedi derbyn argymhellion pedwar seiciatrydd.

Dywedodd fod Thomas yn dal yn "droseddwr peryglus" ond bod ei weithredoedd wedi eu gyrru gan salwch meddwl, a allai gael ei drin.

Fe gyflwynodd orchymyn ysbyty, heb ei gyfyngu gan amser, a gorchymyn cyfyngu amhenodol pellach.

Mae'n golygu y bydd Thomas ond yn cael ei ryddhau wedi i'w achos gael ei ystyried gan yr Ysgrifennydd Gwladol dros Gyfiawnder, a bydd yn rhaid cael sicrwydd nad yw Thomas bellach yn fygythiad i'r cyhoedd.