'Synau gwallgofddyn' ar noson lladdwyd dynes, 71, yn Y Bermo

Bu farw Margaret Barnes yn yr oriau mân ddydd Llun, 11 Gorffennaf 2022

Mae llys wedi clywed tystiolaeth gan gymydog i ddyn sydd wedi'i gyhuddo o guro dynes oedrannus i farwolaeth ar ôl iddi gamgymryd ei gartref fel gwesty.

Roedd Margaret Barnes, 71, ar ei gwyliau yn Y Bermo o Birmingham adeg yr ymosodiad honedig fis Gorffennaf y llynedd.

Mae David Redfern, sy'n 46, yn gwadu llofruddiaeth neu ddynladdiad.

Mae'r erlyniad yn honni i Mr Redfern lusgo Ms Barnes, wedi iddi fynd i'r tŷ anghywir drwy gamgymeriad, o'r gwely ac i lawr grisiau gerfydd ei thraed, cyn ei chicio ac achosi anafiadau angheuol.

Fe ddigwyddodd yr ymosodiad ar Rodfa'r Môr, Y Bermo

Clywodd Llys y Goron Caernarfon ddatganiad gan un o gymdogion Mr Redfern, Lynn Hynes, a ddywedodd bod clywed gweiddi uchel drwy waliau'r tŷ yn "ddigwyddiad cyffredin".

Ar noson yr ymosodiad honedig roedd y gweiddi, meddai, yn swnio fel "synau gwallgofddyn".

Ychwanegodd fod Mr Redfern wedi dweud wrthi i "beidio â chyffwrdd" Mrs Barnes ac i "adael llonydd iddi" pan roedd hi'n gorwedd ar y llawr.

Mae Mrs Hynes hefyd yn dweud bod David Redfern wedi cyfaddef "llusgo [Mrs Barnes] lawr y grisiau a'i thaflu o'r tŷ".

Mae'r achos yn parhau.