Bwcis 'heb ymyrryd i helpu' dyn â phroblem gamblo

Ffoniodd 'Matthew' William Hill i gau ei gyfrif ond fe wnaethon nhw ganiatáu iddo barhau i fetio

Mae dyn sy'n gaeth i gamblo yn dweud y dylai cwmni William Hill fod wedi gwneud mwy i'w atal pan roedd yn mentro miloedd o bunnoedd ar fetiau unigol.

Fe aeth Matthew (nid ei enw go iawn) o dde Cymru i mewn i ddyled o dros £70,000 gyda'r cwmni rhwng 2012 a 2019.

Mae galwadau'n dangos ei fod yn grac ac yn ofidus - mae rheolau gamblo'n dweud y dylai cwmnïau betio ymyrryd os oes arwyddion o ofid.

Dywedodd William Hill nad oedden nhw wedi dod o hyd i unrhyw ddiffygion yn eu dulliau gweithredu.

• 'Gamblo niweidiol yn effeithio ar gymunedau Cymru'

• Angen rheoli gamblo ar-lein sydd 'mor beryglus'

Roedd Matthew, sy'n athro a thad i dri o blant, yn ennill tua £35,000 y flwyddyn pan ddechreuodd fentro symiau bychan ar ddigwyddiadau mawr fel y Grand National.

Cyn hir roedd yn agor cyfrifon ar-lein ac yn manteisio ar gynigion i fetio am ddim.

Fe waethygodd pethau wrth iddo geisio adennill pres wedi mân golledion, ac yn hytrach na mentro ychydig bunnoedd fe fetiodd cymaint â £10,000.

Daeth yn gwsmer 'aur' dan gynllun VIP William Hill, ac yn fuan wedi hynny roedd Matthew yn mentro'i gyflog misol - £2,300 - y diwrnod yr oedd yn ei dderbyn.

'Newidiodd y dynameg yn gyflym'

Ar gyfer rhaglen ddogfen ar BBC Radio 4, Desperate Calls, mae Matthew wedi gwrando'n ôl ar 89 o sgyrsiau ffôn rhyngddo ef a William Hill. 

Nod y mwyafrif oedd defnyddio gwasanaeth quick cash, oedd yn caniatáu iddo dynnu arian yn uniongyrchol i'r cwmni heb orfod aros iddo glirio yn ei gyfrif banc. CashDirect yw enw newydd y gwasanaeth.

Weithiau fe fyddai'n gadael y siop gyda £5,000 mewn arian parod.

Cafodd dwsinau o'r galwadau eu gwneud o hen flwch ffôn tu allan i'r siop. Roedd yn gwario cymaint ar gamblo fel na allai fforddio ei fil ffôn symudol.

Fe ffoniodd 'Matthew' o flwch cyhoeddus pan na allai fforddio biliau ffôn symudol

Dywedodd William Hill bod Matthew wedi ennill betiau llawer o weithiau a thynnu miloedd o bunnau o'i gyfrif, ond yn ôl Matthew fe fyddai'n ail-fentro'r arian bron yn syth.

"Newidiodd y dynameg yn gyflym," meddai. "Roedd bywyd yn troi o gwmpas gamblo.

"O edrych yn ôl, roedd bywyd yn niwlog. Rwy'n stryglo i gofio llawer o'r ddegawd ddiwetha', oni bai am feddyliau tywyll iawn, isafbwyntiau difrifol ac ambell uchafbwynt.

"Dim canolbwyntio ar y teulu a'r bobl sydd agosaf ata'i."

Mae gan Matthew £70,000 o ddyledion hyd heddiw i berthnasau a ffrindiau. 

• 'Yr unig adeg do'n i ddim yn gamblo oedd wrth gysgu'

• Gamblo'n 'difetha bywydau' yn ôl doctor a dwyllodd y GIG

Roedd Matthew yn flin ac yn ofidus mewn llawer o'r galwadau i William Hill.

Yn ôl rheolau'r Comisiwn Gamblo, dylai cwmnïau betio gadw golwg am bobl sy'n mynd yn gaeth ac ymyrryd os ydyn nhw'n arddangos arwyddion o ofid.

Dywed Matthew na ddigwyddodd hyn a bod William Hill wedi caniatáu iddo barhau i fetio.

Cyrraedd y pen

Ffoniodd aelod o dîm diwydrwydd dyladwy (due diligence) William Hill wedi i Matthew anfon ebost yn mynegi awydd i "eithrio ei hun" am ei fod yn flin ynghylch diffyg betiau di-dâl.

Roedd hynny'n golygu cau ei gyfrif am byth ac atal mynediad i wefannau betio eraill.

Yn ystod y sgwrs, trafododd yr aelod staff hunan-eithrio a phrosesau eraill i ffrwyno arferion gamblo.

Ond yn y pen draw, fe ganiataodd i Matthew barhau, gan ystyried yr alwad yn gŵyn ynghylch y gwasanaeth a'r diffyg betiau am ddim, yn hytrach nag yn fater o gyfrifoldeb cymdeithasol.

Yn ôl Matthew, ni ddywedodd bod ganddo broblem, gan nad oedd stopio gamblo "yn ganlyniad dymunol ar y pryd".

"Yn sail i bopeth yw'r awydd i ennill yr holl bres yn ôl," meddai.

Dywed William Hill eu bod yn cymryd cwynion cwsmeriaid o ddifri

Fe gyrhaeddodd bwynt pan wyddai Matthew bod yn rhaid iddo stopio gamblo. Aeth gyda'i deulu i'r meddyg teulu ac mae wedi cael cymorth cwnsela ers hynny i fynd i'r afael â'i broblem gamblo.

Ond roedd Matthew eisiau deall beth oedd wedi digwydd.

"Unwaith y cafodd y cylch o gamblo ei thorri, wnes i asesu mynydd o ddata ges i dan gais mynediad i wybodaeth," meddai.

"Ysgrifennais lythyr yn cwyno i William Hill."

'Sicrhau safonau uchel yn ganolog'

Dywedodd William Hill eu bod "wedi cynnal ymchwiliad manwl i'n rheolaeth o gyfrif Matthew", a chanfod "dim diffygion yn ein dulliau gweithredu gamblo diogelach mewn cysylltiad ag anghenion cyfrif Matthew yn y cyfnod dan sylw".

Ychwanegodd y cwmni bod "sicrhau safonau uchel o ran gamblo diogelach ac atal niwed mewn cysylltiad â gamblo yn ganolog i'r ffordd y mae William Hill yn gweithredu".

Pwysleisiodd eu bod "yn cymryd unrhyw gŵyn gan gwsmeriaid yn hyn o beth yn eithriadol o ddifri, ac yn ymroddi i sicrhau gwelliant parhaus yn y maes yma".

Cafodd William Hill ddirwy o £6.2m yn 2018 am fethu ag amddiffyn cwsmeriaid.

Roedd llawer o'r achosion a gafodd eu hamlygu gan y rheoleiddiwr yn debyg i un Matthew ac wedi digwydd tua'r un pryd.

Mae disgwyl i Lywodraeth y DU gyhoeddi papur gwyn yn fuan, gan argymell gwiriadau llym bod unigolion yn gallu fforddio betio, ac mae disgwyl ombwdsmon newydd i ddelio gyda chwynion.

Ar hyn o bryd, gall pobl â chwynion cyfrifoldeb cymdeithasol ond ysgrifennu at y Comisiwn Gamblo. Gan na allai'r Comisiwn wneud sylw ar y camau y mae'n eu cymryd, mae'n gadael llawer o bobl yn dal yn y niwl.

Dywedodd Matthew: "Heb newis sylweddol, bydd llawer mwy o bobl yn syrthio i'r un fagl ag y gwnes i. Bydd mwy o fywydau'n cael eu dinistrio, mwy o deuluoedd a chyfeillgarwch yn chwalu a mwy o fywydau'n cael eu colli."

Desperate Calls, 13:30 BBC Radio 4 ddydd Sul 19 Mawrth, ac yna ar BBC Sounds

Os ydych chi neu rywun rydych chi'n eu hadnabod wedi'ch effeithio gan y materion a godwyd yn y stori yma, mae cefnogaeth ar gael arwefan BBC Action Line.