Meddyg achos twyll i gael ailgydio yn ei waith

Bydd meddyg o Gaerdydd oedd â phroblem gamblo difrifol, ac a dwyllodd y gwasanaeth iechyd yn ariannol, yn cael ailgydio yn ei waith.

Fe blediodd Dr Aled Meirion Jones, ym mis Ionawr 2021, yn euog i ddau gyhuddiad o dwyllo cyfanswm o £67,420.

Cafodd ddedfryd o 24 mis yn y carchar, wedi ei ohirio am ddwy flynedd, a gorchymyn i wneud 200 awr o waith di-dâl.

Cyfaddefodd ei fod wedi dwyn sieciau a hawlio arian am shifftiau locwm nad oedd wedi eu gweithio, ac fe gafodd ei dynnu oddi ar y gofrestr feddygol.

Mae tribiwnlys nawr wedi penderfynu y caiff ailddechrau gweithio fel meddyg o 11 Ebrill.

• Gamblo'n 'difetha bywydau' yn ôl doctor a dwyllodd y GIG

• Ymestyn gwaharddiad doctor wnaeth dwyllo'r GIG

Clywodd y tribiwnlys ei fod yn feddyg da oedd wedi gweithio'n galed i fynd i'r afael â'r problemau ar ôl derbyn cefnogaeth a chwnsela helaeth.

Daeth y panel i'r casgliad ei fod yn annhebygol o droseddu eto a'i fod wedi datblygu dealltwriaeth o'i broblem gamblo.

Mae wedi cwblhau ei ddedfryd ac mae wedi ad-dalu'r holl arian a gafodd trwy dwyll.

Mae Dr Aled Meirion Jones wedi cwblhau sawl her seiclo er mwyn codi arian dros elusen sy'n helpu pobl fynd i'r afael â bod yn gaeth i alcohol, cyffuriau a gamblo

Clywodd y gwrandawiad bod Dr Jones wedi cael cynnig dwy swydd, gan gynnwys dychwelyd i feddygaeth trawsblannu yn Ysbyty Athrofaol Cymru, yng Nghaerdydd.

Ar ôl ystyried datganiad y meddyg o Landaf dywedodd y panel ei fod "o ddifrif wrth fynegi edifeirwch".

Clywodd y tribiwnlys bod Dr Jones wedi gwirfoddoli i weithio ar wardiau Covid yn ystod y pandemig ac wedi gweithio mewn canolfan frechu Covid.

Roedd hefyd wedi gweithio dros 600 awr o shifftiau gwirfoddol trawsblaniadau arennol.

• Bwcis 'heb ymyrryd i helpu' dyn â phroblem gamblo

• 'Gamblo niweidiol yn effeithio ar gymunedau Cymru'

Mewn cyfweliad gyda BBC Cymru yn 2021, dywedodd Dr Jones y bydd "wastad â chywilydd" oherwydd yr hyn a ddigwyddodd wedi iddo fynd yn gaeth i gamblo.

Dywedodd bryd hynny ei fod wedi colli £800,000 a bod gamblo wedi "difetha" ei fywyd a'i berthnasau.

Yn y 12 mis diwethaf, mae Dr Jones wedi gwirfoddoli i gludo adnoddau meddygol i Wcráin, ac ymhlith sawl geirda ar ei ran roedd un gan feddyg ysbyty yn ninas Chernihiv, i'r gogledd o Kyiv.