'Ofnadwy' rhannu honiadau ffug am ymosodiad Manceinion

Fe gafodd Lisa Bridgett ei hanafu'n ddifrifol yn ymosodiad Arena Manceinion

Mae dynes a gafodd ei hanafu'n ddifrifol yn ymosodiad Arena Manceinion yn gobeithio y bydd gweithredu cyfreithiol yn erbyn dyn wnaeth rannu honiadau ffug am y digwyddiad yn atal rhagor o gelwyddau yn y dyfodol.

Fe gollodd Lisa Bridgett, sy'n byw ger Pwllheli, Gwynedd, ei bys wedi i fom ffrwydro yng nghyngerdd Ariana Grande yn 2017.

Mae Richard D Hall yn honni fod yr ymosodiad wedi ei ffugio ac mae dau ddioddefwr arall yn cymryd camau cyfreithiol yn ei erbyn.

Mae Mr Hall wedi gwrthod ymateb i gais y BBC am sylw.

• Ymosodiad Manceinion: Profiad y Cymry

"'Dw i eisiau iddo atal pobl rhag dweud pethau sydd ddim yn wir pan maen nhw'n ffeithiau cywir," dywedodd Ms Bridgett.

Fe gafodd ei tharo'n ei wyneb gan ddarnau o haearn (shrapnel) yn ystod y cyngerdd. Roedd hi yno gyda'i merch a ffrind ei merch.

Mae Martin ac Eve Hibbert, sydd bellach yn byw ag anableddau difrifol ers y cyngerdd, yn erlyn Mr Hall am achosi niwed i'w henw da ac am aflonyddu.

'Pam fyddai unrhyw un yn ffugio anafiadau?'

Fe aeth Mr Hall i weithle Ms Bridgett yn 2019 gyda'r nod, meddai, o'i recordio'n gyfrinachol i weld a oedd hi'n dweud celwydd am ei hanafiadau.

"Pam fyddai unrhyw un yn ffugio'n hanafiadau a digwyddiadau eraill?" meddai.

"Ges i sioc fawr o weld y byddai rhywun yn mynd allan o'u ffordd i gynhyrchu'r fath straeon a'n cyhuddo ni gyd o ddweud celwydd ac actio."

Fe gysylltodd rhaglen BBC Panorama â Ms Bridgett a dweud wrthi am fideos ar dudalennau cyfryngau cymdeithasol Richard Hall.

"Roedd o gyda dynes mewn un fideo ac fe eisteddodd a phigo ar bethau yn ein cyfweliadau gan ddweud ein bod yn gwneud y cyfan i fyny, gan chwerthin gyda'i gilydd.

"Roedd o'n ofnadwy... roedden ni'n ddig eu bod nhw'n gallu gwneud hwyl am ein pennau," meddai.

"Dywedodd ein bod ni i gyd yn hyn gyda'n gilydd a'i fod yn un jôc fawr. Roedd yn ddigwyddiad 'da ni i gyd yn gorfod byw gydag am weddill ein bywydau."