Pasg prysur yn 'hollbwysig' i fusnesau lleol Cymru

Mae Laura, Lauren a Nia yn pwysleisio pa mor bwysig yw cael Pasg prysur i'w busnesau

Mae'n hanfodol bod gwyliau'r Pasg yn llwyddiant os yw busnesau yng Nghymru am oroesi eleni.

Dyna'r rhybudd gan nifer o fusnesau bach ar hyd y wlad wrth iddyn nhw baratoi ar gyfer penwythnos gŵyl y banc.

Mae Ffederasiwn Busnesau Bach Cymru yn dweud bod y sefyllfa bresennol yn bryder i nifer, gan ychwanegu pa mor bwysig yw hi i bobl wario'n lleol.

Mae Llywodraeth Cymru yn cydnabod yr heriau sy'n bodoli, gan ddweud eu bod yn gwneud popeth sy'n bosib i gefnogi pobl, busnesau a chymunedau.

• Prisiau ynni 'heriol' yn pryderu siopau bach

• 2023 yn 'waeth i bobl a busnesau na'r pandemig'

• Busnesau twristiaeth yn ofni blwyddyn galed

Yn ôl Laura Hubbard, sy'n rhedeg bwyty Flows yn Llandeilo, mae'r wythnosau nesaf yn hanfodol ar gyfer dyfodol y busnes.

"Ni 'ishe pobl i wario arian. Ma' bills a pethe' yn codi, trydan, bwyd," dywedodd.

"Ma' pobl dal yn gwario arian, ond ddim mor aml ag o'n nhw cyn y pandemig."

Mae Nia Prytherch wedi gorfod addasu'r ffordd mae'n gweithio oherwydd costau cynyddol

I Nia Prytherch yn Llandeilo, mae'r misoedd diwethaf wedi golygu newid mawr o safbwynt ei busnes.

Mae wedi cau ei siop flodau, gan benderfynu gwneud y gwaith o adref er mwyn arbed arian.

"[Mae] rhedeg siop nawr wedi mynd yn ddrud iawn. O'dd angen rhyw £3,500 arna' i cyn bo' fi'n agor y drws bob mis, ac o'dd hwnna'n codi ac yn mynd yn fwy bob blwyddyn.

"Ni ddim yn gw'bod beth sydd o'n blaenau ni. Ni 'di ca'l Brexit, wedyn Covid, a nawr y problemau 'ma, gyda Rwsia yn ategu at y problemau gyda chostau byw.

"Ma' 'da fi obaith, ond mae'n mynd i fod yn flwyddyn anodd iawn 'dw i'n credu i fasnach yn gyffredinol."

'Brwydro gyda biliau'

Yn debyg i'r busnesau yn Llandeilo, mae Lauren Evans ym Mhorthcawl yn wynebu heriau. Mae Fablas yn fusnes hufen iâ sy'n cyflogi bron i 30 o bobl yn lleol.

Lauren Evans yw cyfarwyddwr cwmni Fablas, a dywedodd ei bod yn poeni am y misoedd nesaf oherwydd costau ynni

"Rydyn ni'n brwydro gyda'n biliau trydan. Maen nhw'n anhygoel. Mae'n rhaid i ni gadw ein rhewgelloedd 'mlaen 24/7," dywedodd.

"Rydyn ni'n mynd mewn i'n hamser prysuraf ond o fis Medi i fis Ebrill y flwyddyn ganlynol, sut ydyn ni'n mynd i ymdopi?

"Bydd yn rhaid i ni wirioneddol bwyso a mesur beth rydyn ni'n mynd i'w wneud ym mis Medi os nad yw'r llywodraeth yn camu i'r adwy a helpu gyda chostau."

'£1 yn mynd ymhellach yn lleol'

Gyda gwyliau banc ychwanegol ar y gweill yr haf hwn i nodi Coroni'r Brenin Charles, mae Ffederasiwn Busnesau Bach Cymru yn annog pobl i wario eu harian yn lleol.

Yn ôl Ben Cottam, pennaeth y ffederasiwn, mae'r rhagolygon "yn anodd" o fewn "un o sectorau mwyaf deinamig" Cymru.

"Mae'n bwysig nad ydym ni fel defnyddwyr yn anghofio'r rôl hanfodol mae busnesau bach yn ei chwarae yn ein cymunedau.

"Mae eich £1 yn mynd ymhellach pan fydd yn mynd yn lleol, felly mae'n hollbwysig ein bod yn defnyddio'r penwythnos gŵyl banc hwn i ddangos cefnogaeth i'n busnesau lleol."

Mae Ben Cottam yn dweud ei bod yn hollbwysig fod pobl yn gwario'n lleol

Dywed Llywodraeth Cymru ei bod yn cydnabod yr heriau mae llawer yn eu hwynebu yng Nghymru ar hyn o bryd.

Dywedodd Dawn Bowden, y Dirprwy Weinidog dros y Celfyddydau a Chwaraeon, fod y llywodraeth yn "canolbwyntio ar ledaenu buddion twristiaeth" ledled Cymru.

"Mae effaith y dewisiadau economaidd bwriadol a gymerwyd gan lywodraethau olynol y DU yn cael effaith negyddol ar dwristiaeth Cymru," meddai.

"Mae hyn yn cynnwys prisiau ynni uchel iawn, recriwtio staff yn anodd oherwydd y math o Brexit mae Llywodraeth y DU wedi'i ddewis, a'r argyfwng costau byw sy'n wynebu cymaint o deuluoedd ledled Cymru a gweddill y DU."

Dywedodd y Canghellor Jeremy Hunt ddechrau'r flwyddyn fod cefnogi busnesau a theuluoedd yn flaenoriaeth iddo ef a'r llywodraeth.

Mae Llywodraeth y DU hefyd wedi lansio ymgyrch i helpu busnesau bach a chanolig i leihau eu biliau ynni, gan gynnig cyngor ar sut i arbed ynni.