Ian Watkins 'wedi ei drywanu yn y carchar'

Plediodd Ian Watkins yn euog i 13 o gyhuddiadau yn ei erbyn yn Llys y Goron Caerdydd yn 2013

Mae Gwasanaeth y Carchardai yn ymchwilio i ymosodiad ar gyn-ganwr y Lostprophets, Ian Watkins yn y carchar yn Wakefield.

Yn 46 oed ac yn hanu o Bontypridd, cafodd ddedfryd o 29 mlynedd dan glo a chwe blynedd ar drwydded yn Llys y Goron Caerdydd yn 2013 am droseddau rhyw yn erbyn plant.

Mae papur newydd y Mirror yn honni iddo gael ei drywanu.

Nid yw ei anafiadau yn rhai sy'n peryglu bywyd, yn ôl Heddlu Gorllewin Sir Efrog.

Dywedodd llefarydd ar ran Gwasanaeth y Carchardai fod yr heddlu'n ymchwilio i ddigwyddiad yn y carchar ddydd Sadwrn.

Ychwanegon nhw: "Ni allwn wneud sylw pellach tra bod yr heddlu'n ymchwilio."

Bu i farnwyr wrthod apêl gan Watkins yn 2014 i leihau hyd ei gyfnod yn y carchar.