Gostyngiad eto yng ngraddau gorau canlyniadau TGAU

Mae graddau TGAU yng Nghymru wedi gostwng o'u cymharu â'r llynedd wrth i'r canlyniadau symud yn agosach at lefelau cyn y pandemig.

Fel yn achos y canlyniadau Safon Uwch wythnos yn ôl, roedd y graddau gorau yn dal yn uwch nag yn 2019 - y tro diwethaf cyn Covid i ddisgyblion orfod sefyll arholiadau.

Roedd 21.7% o'r graddau TGAU yn A neu'n A*, a 64.5% yn A* i C.

• Miloedd yn derbyn canlyniadau TGAU - dilynwch yn fyw

Dywedodd Cymwysterau Cymru, sy'n goruchwylio'r arholiadau, bod terfynau graddau yn is yn achos rhai pynciau er mwyn cefnogi myfyrwyr a gafodd eu heffeithio gan y pandemig.

Beth oedd y graddau eleni?

Roedd 64.9% rhwng A*-C, cwymp o 68.6% haf y llynedd pan gafodd graddau eu pennu gan athrawon.

Ar y brig, cafodd 21.7% raddau A* ac A, cwymp arall ond yn uwch na chyn y pandemig.

Roedd 300,409 o gofrestriadau arholiad - sydd 3.4% yn is na 2022, ond yn uwch na 2019.

O'r rheiny, roedd 6.4% yn ddisgyblion Blwyddyn 10 yn sefyll arholiad flwyddyn yn gynnar.

Roedd cynnydd o 30% yn y nifer safodd arholiadau mewn Astudiaethau Busnes, a chynnydd mewn ceisiadau Economeg hefyd.

Ond cwympo mae'r niferoedd sy'n dewis Almaeneg, Ffrangeg a Llenyddiaeth Saesneg.

Roedd Edie, Charlotte, Erin a Charlie ymhlith y disgyblion gafodd eu graddau yn Ysgol Morgan Llwyd, Wrecsam ddydd Iau

• Diwrnod canlyniadau TGAU: 'Dwi ar bigau'r drain'

• Safon Uwch: Gostyngiad yn y graddau uchaf

Roedd y gefnogaeth arbennig eleni wrth gynnal arholiadau TGAU ffurfiol yn cynnwys gwybodaeth ymlaen llaw am gynnwys arholiadau a dull cefnogol o raddio.

Mae arweinwyr ysgolion wedi dweud bod "symud yn raddol" ar lefelau cyn y pandemig yn well na "cwymplaniad".

Mae'r Gweinidog Addysg, Jeremy Miles wedi llongyfarch disgyblion ar eu canlyniadau

Gan longyfarch disgyblion ar draws Cymru wrth ymweld ag Ysgol Morgan Llwyd yn Wrecsam, dywedodd y Gweinidog Addysg, Jeremy Miles: "Dylech i gyd fod yn falch o gyrraedd y garreg filltir bwysig hon yn eich addysg.

"Rwy'n croesawu'r canlyniadau hyn wrth i'n taith yn ôl at drefniadau cyn y pandemig barhau."

Ychwanegodd: "Bu'n rhaid i'r dysgwyr yma wynebu heriau anferth a wnaeth effeithio ar eu cyfleoedd dysgu dros y blynyddoedd diwethaf wrth iddynt symud drwy eu haddysg uwchradd ac ymlaen i'w TGAU.

"Ar draws Cymru mae'r canlyniadau'n ymddangos yn debyg i beth oedden ni'n disgwyl gweld.

"O'n ni'n cynllunio ar y sail y byddai canlyniadau rhyw hanner ffordd rhwng lle oedden nhw cyn Covid a'r canlyniadau gafon ni llynedd, a dyna beth y'n ni 'di gweld ar y cyfan."

Mesurau Covid i ddod i ben

Dywedodd Mr Miles ei bod yn debygol y bydd pethau'n newid flwyddyn nesaf gyda mesurau Covid - fel gwybodaeth am gynnwys arholiadau o flaen llaw - yn cael eu dileu.

"Bydd Cymwysterau Cymru'n gwneud datganiad ym mis Medi ond maen nhw wedi dweud eisoes bod nhw'n bwriadu erbyn haf nesa' i fynd nôl i'r approaches oedd gyda ni cyn y pandemig."

Ond ychwanegodd y bydd cymorth ar-lein gan y llywodraeth yn debygol o barhau.

"Un o'r pethau y'n ni wedi neud eleni fel llywodraeth yw darparu adnoddau ar-lein i gefnogi pobl ifanc gyda'u harholiadau o ran technegau adolygu ond hefyd o ran iechyd meddwl a phryder, a byddwn ni'n disgwyl gallu parhau gyda hwnna yn y dyfodol."

Greta a Gwawr yn gwenu ar ôl derbyn eu canlyniadau yn Llangefni

"Doeddwn i methu â chysgu neithiwr yn poeni am y canlyniadau," meddai Gwawr o Ysgol Gyfun Llangefni a gafodd 13 gradd A*.

Roedd canlyniadau Greta hefyd yn ardderchog - rhes o'r graddau uchaf.

'Pwyll cyn cymharu o flwyddyn i flwyddyn'

Mae disgyblion a'u hathrawon wedi sicrhau "cyfres cryf arall o ganlyniadau, gan adlewyrchu blynyddoedd o waith caled," yn ôl yr undeb athrawon NASUWT.

Ond maen nhw'n rhybuddio bod canlyniadau eleni "yn anochel yn amlygu rhywfaint o amrywiad o'u cymharu â'r ychydig flynyddoedd diwethaf" a bod angen "pwyll cyn cymharu canlyniadau o flwyddyn i flwyddyn".

Roedd yna sawl wên i'w gweld yn Ysgol Uwchradd Llanisien, Caerdydd ddydd Iau

Dywed yr undeb bod lleihau'r gefnogaeth ôl-pandemig i ddisgyblion yn raddol yn beth da, ond "dyw ddim yn cuddio'r ffaith bod athrawon wedi cael eu gadael i wneud eu gorau heb y lefelau angenrheidiol o fuddsoddiad" i helpu disgyblion ddal i fyny â'u haddysg.

Ychwanegodd prif swyddog NASUWT yng Nghymru, Neil Butler: "Ni ddylai pobl ifanc fod dan anfantais oherwydd yr amrywiaeth yng ngraddau eleni.

Fe fydd "yn hanfodol", meddai, i golegau, prifysgolion a chyflogwyr "gydnabod amgylchiadau penodol a chyd-destun graddau eleni a gweithredu'n sensitif wrth ystyried cynnig llefydd neu gyflogaeth i bobl ifanc".

Dadansoddiad Bethan Lewis, Gohebydd Addysg a Theuluoedd

Yr un yw'r stori heddiw a phan gafodd canlyniadau Safon Uwch eu cyhoeddi union wythnos yn ôl - graddau lawr o'i gymharu â'r llynedd ond yn uwch nag yn 2019.

Fe gafodd disgyblion TGAU, fel rhai Safon Uwch, rhywfaint o wybodaeth cyn arholiadau i helpu gyda'r adolygu a ffiniau graddau mwy hael.

Y bwriad oedd osgoi cwympo'n ôl yn rhy sydyn at lefelau graddau cyn y pandemig, ar ôl cyfnod o ganlyniadau llawer uwch.

Roedd y Gweinidog Addysg, Jeremy Miles yn Ysgol Morgan Llwyd yn Wrecsam, a dywedodd ei fod yn disgwyl i'r gefnogaeth ychwanegol yna ddiflannu flwyddyn nesaf.

Ar yr un pryd mae'n cydnabod na fydd effaith y pandemig ar ddisgyblion wedi mynd.

Ac mae pennaeth yr ysgol ymhlith y rheini sy'n dweud y bydd angen rhoi ystyriaeth arbennig i ddisgyblion flwyddyn nesaf hefyd, a thu hwnt.