3 Llun: Lluniau pwysicaf Joanna Jones
- Cyhoeddwyd
Os fyddai rhaid i chi ddewis tri llun sydd yn cynrychioli eich bywyd chi, pa luniau bydden nhw?
Yr arlunydd o Lansamlet Joanna Jones sy'n dewis ei hoff luniau i Cymru Fyw yr wythnos yma.
Y Bois - Un o'r pethau mwyaf handi sydd gennyf yw fán camper VW. A gan fy mod yn artist llawn amser bellach mae hon yn rhoi'r rhyddid i ni aros noson fan hyn a fan draw i gasglu syniadau mewn llefydd sydd yn annwyl imi, fel Rhandirmwyn ac arfordir Sir Benfro.
Un o'r mannau hudolus hyn yw Garn Fechan, Pencaer. A dyma lun o Meirion a Gelert yn edrych tua'r gorwel yno.
Pan yn blentyn roedd gen i afr fel anifail anwes! Ac roedd hi'n olygfa ddoniol i drigolion y pentre' i 'ngweld i a 'ngafr yn mynd am dro. Yn y cyfnod hwnnw fy mreuddwyd oedd gweithio ym Mharc Penscynor, a hyd heddiw mae anifeiliaid yn allweddol i 'mywyd. Nawr rydym yn cadw merlod, a dyma fi gydag un ohonyn nhw sef Dinky.
Portread o Mam - mae'r llun yma yn bwysig iawn i fi. Fe gollon ni Mam pan oedd hi'n ifanc, ac mae'r portread hwn a wnes i ohoni yn dal rhywfaint o'r hiraeth. Yn y llun mae tri sbrigyn o Lili'r Dyffryn, sef ei hoff flodyn, symbol o'r tri ohonon ni blant. Roedd ganddi ffydd gadarn, roedd yn llawn bywyd ac roedd ganddi gariad at bawb. Roedd y tŷ yn agored ac yn llawn chwerthin.
Mi fydd Joanna'n arddangos ei gwaith yng ngaleri Mimosa, Llandeilo ar yr 11eg o Dachwedd eleni.
Hefyd o ddiddordeb: