Dadl am droi cartref gofal yn llety gweithwyr parc gwyliau

Fe gaeodd cartref Foelas yn 2022 ac mae ymdrechion ar droed i'w droi yn dŷ amlfeddiannaeth 17 lofft i weithwyr yn y diwydiant gwyliau

Mae cais i drosi cyn-gartref preswyl yn llety i weithwyr parciau gwyliau wedi codi gwrychyn mewn pentref yng Ngwynedd.

Mae'r awdurdod lleol wedi derbyn cais cynllunio i droi hen gartref preswyl Foelas yn Llanrug yn dŷ amlfeddiannaeth.

Byddai'r tŷ, medd y datblygwyr, yn cael ei droi'n gyfleuster 17 ystafell wely ar gyfer defnydd gweithwyr parciau gwyliau yn Eryri.

Mae hyn er i gais tebyg gael ei wrthod ar gyfer yr un safle yn gynharach eleni, lle codwyd pryderon dros ddiffyg parcio digonol.

Yn ôl y cynghorydd sir lleol, mae'r ffaith fod y cynllun wedi ei ail gyflwyno yn achos penbleth, gyda chyfarfod arbennig o'r cyngor cymuned i drafod y cais newydd ddydd Mawrth.

• Llanrug: Galw am ddatblygu er budd ysgol yn lle tai

• Gwynedd: Cynllun hostel gwyliau i hen gartref gofal

'Ateb gofyn amlwg'

Fe gaeodd y cartref ei ddrysau y llynedd, er i'r datblygwyr ddatgan fod ymdrechion wedi bod i'w werthu.

Ymysg y rhesymau i wrthod y cais gwreiddiol i'w drosi yn dŷ amlfeddiannaeth oedd "nad oes darpariaeth ddigonol o barcio ac nad oes darpariaeth ddigonol o ddulliau teithio cynaliadwy".

Ychwanegodd swyddogion nad oedd gwybodaeth digonol ychwaith "i ddangos sut mae'r bwriad yn mynd i warchod, hyrwyddo a chryfhau'r iaith Gymraeg".

Daeth dros 60 o bobl i gyfarfod cyhoeddus ym mis Mai pan dderbyniwyd y cais cynllunio gwreiddiol

Mewn ymateb, dywed yr ymgeiswyr yn eu cais diweddaraf y byddai trosi'r adeilad yn gwneud defnydd o adeilad gwag ac yn ateb galw amlwg am lety o'r fath yng Ngwynedd.

"Mae'r ymgeisydd," medd dogfennau cynllunio Ronnie Moore, "yn cynghori bod cost llety yn Eryri yn ystod y tymor brig yn afresymol, ac felly mae staff yn gorfod cymudo i barciau gwyliau pell.

"Mae cabanau pren un gwely dros £900 y mis yn yr haf a £700 y mis yn y gaeaf."

Gan ychwanegu fod ymgais i werthu'r adeilad fel cartref preswyl wedi bod yn aflwyddiannus, gyda "darparwyr cartrefi gofal eisiau lleiafswm o 30 ystafell er mwyn cymryd eiddo ymlaen", dywedon nhw nad yw ei redeg fel cartref o'r fath "yn ariannol hyfyw yn y farchnad bresennol".

Gyda'r perchennog "yn hapus i ymgysylltu â'r cyngor os oes angen unrhyw fesurau lliniaru eraill er mwyn helpu i hyrwyddo'r iaith a diwylliant Cymraeg", mae'r cais hefyd yn nodi'r farn fod y maes parcio sydd ar y safle - sydd â lle i 8 o geir - yn ddigonol a bod y defnydd arfaethedig "yn gwbl briodol ar gyfer y safle".

'Y pryder yn real iawn'

I drafod y cais newydd mae cyfarfod arbennig o Gyngor Gymuned Llanrug a Cwm-y-glo eisoes wedi ei alw ar gyfer nos Fawrth.

Ond yn ôl y cynghorydd sir lleol mae'r ffaith fod cais tebyg wedi ei ail gyflwyno ond ychydig fisoedd ar ôl cael ei wrthod y tro diwethaf yn achos penbleth a phryder yn lleol.

Dywedodd y Cynghorydd Beca Brown fod y cynllun "yn anghydnaws hefo cymeriad y pentref"

"Mae HMO [House in multiple occupation] hefo gymaint o lofftydd yn anghydnaws hefo cymeriad y pentref," meddai'r Cynghorydd Beca Brown wrth Cymru Fyw.

"Mae'r cartref ar un o ffyrdd prysuraf yr ardal ac mae 'na lot o heriau parcio.

"Pan oedd o'n gartref henoed doedd hynny ddim gymaint o broblem ond fel HMO 17 llofft does 'na ddim capasiti parcio.

"I'r trigolion cyfagos, maen nhw eisoes yn gorfod parcio ar y lôn a fasa hwn yn gwneud pethau'n waeth ac yn ychwanegu at broblemau traffig Station Road.

"Mae rhywun yn meddwl am HMOs mewn dinasoedd neu drefi mwy, a dydi un mor fawr â hyn ddim yn siwtio. Mae'r teimlad yn erbyn hwn yn hynod o gryf.

"Mi fuodd 'na gyfarfod cyhoeddus tro diwethaf hefo rhyw 60-70 o bobl, sy'n arwydd o gryder y teimlad.

"Unwaith aeth y cais yma i fewn, y cwbl dwi wedi'i gael ers hynny ydi pobl yn holi fi amdano. Mae'r pryder yn real iawn."

Mae disgwyl i Gyngor Gwynedd drafod y cais dros y misoedd nesaf.