Canfod corff yn dilyn tân mawr ar stad ddiwydiannol

Cafodd "digwyddiad difrifol" ei gyhoeddi yn dilyn y ffrwydrad nos Fercher

Mae corff wedi cael ei ddarganfod yn dilyn tân mawr ar stad ddiwydiannol Trefforest ger Pontypridd.

Roedd y gwasanaethau brys wedi dweud fod un person ar goll yn dilyn y digwyddiad nos Fercher.

Cafodd tri pherson arall fân anafiadau ac fe gafodd o leiaf un adeilad ei ddinistrio.

Mae'r heddlu'n apelio ar unrhyw un sydd ag unrhyw luniau fideo o'r digwyddiad i gysylltu â nhw.

• Cyhoeddi 'digwyddiad difrifol' ar ôl 'ffrwydrad anferth'

Mae blodau wedi cael eu gadael ger safle'r digwyddiad

Mae'r heddlu a'r gwasanaeth tân wedi lansio ymchwiliad ar y cyd i achos y digwyddiad, yngŷd â'r Gweithgor Iechyd a Diogelwch.

Dywedon nhw nad yw'r corff wedi cael ei adnabod yn ffurfiol eto, ond mae teulu'r person oedd ar goll yn derbyn cefnogaeth swyddogion arbenigol.

Dywedodd y prif arolygydd Paul Rikes: "Ry'n ni'n gofyn i unrhyw un sydd â gwybodaeth all fod o ddefnydd i'r ymchwiliad, ac sydd heb gysylltu â'r heddlu eto, i wneud hynny."

Mae'r apêl yn cyfeirio yn benodol at luniau camerâu cylch cyfyng, camerâu cloch drws a lluniau dashcam.

Dywedodd y Directif Brif-arolygydd Richard Jones o Heddlu'r De eu bod yn meddwl am deulu y person sydd wedi marw.

"Nawr bod y tân dan reolaeth fe fyddwn yn symud i'r cam o ymchwilio er mwyn canfod beth oedd achos y ffrwydrad a'r tân," meddai.

"Mae ffyrdd yn cael eu hailagor yn raddol, ond bydd rhai ffyrdd a busnesau yn yr ardal yn dal i gael eu heffeithio."

'Dim geiriau i gyfleu tristwch y sefyllfa'

Mewn neges ar Facebook, dywedodd Andrew Cox, perchennog siop trin gwallt a gafodd ei ddifrodi yn y tân, ei fod "yn cydymdeimlo â phawb oedd yn adnabod y fenyw fu farw yn y ffrwydrad ofnadwy".

"Does dim geiriau i gyfleu tristwch y sefyllfa, ac mae ein meddyliau gyda'i theulu," meddai.

Ychwanegodd fod y gefnogaeth y mae'r busnes wedi ei dderbyn ers y digwyddiad wedi bod yn syfrdanol a'i fod yn wirioneddol ddiolchgar am yr holl garedigrwydd.

Mae Mindset Gym, busnes arall sydd â safle yn y stad ddiwydiannol, hefyd wedi rhannu neges ar Facebook: "Mae ein meddyliau gyda chymuned a theulu'r fenyw wedi'r ddamwain drasig yma.

"Bydd Mindset yn sicrhau ein bod ni'n gwneud popeth o fewn ein gallu i gefnogi'r teulu."

Mae Ffordd Hafren yn gartref i nifer o fusnesau gan gynnwys safle gwerthu ceir, campfa a siop anifeiliaid anwes.

Clywed am y ffrwydrad drwy'r cyfryngau cymdeithasol wnaeth Phil Thomas, perchennog Bragdy Twt Lol.

"O'n i'n edrych ar y lluniau cylch cyfyng bore ma' a chi'n gallu gweld flach oren sef adlewyrchiad o'r ffrwydrad, ac ryw eiliad neu ddau yn hywrach chi'n gallu clywed y ffrwydrad a bach o lwch yn symud," ychwanegodd.

Dywedodd Lucy Artiss, sy'n berchen ar fusnes tatŵs ei bod hi "wedi colli popeth" ond bod pawb wedi llwyddo i ddianc yn ddianaf.

Ychwanegodd perchennog y garej Esso cyfagos, Krishanaraj Nadarajah, ei fod wedi clywed "ffrwydrad enfawr" yn dod o'r ardal.

"Roedd o fel daeargryn... es i allan ac roedd y tân yn dechrau tyfu... roedd y tân yn enfawr ac roedd llwyth o fwg hefyd," meddai.

Mae neuadd gerddoriaeth Green Room wedi'i lleoli ar y stad hefyd.

Dywedodd y perchennog Johnny Foxhall bod y ffrwydrad yn "sioc fawr" ac yn teimlo fel ei fod wedi cael ei "fwrw yn ei gefn".

"Cafodd y drws ei daflu ar agor, a popeth yn siglo - es i allan a gweld glow oren a'r mwg yn codi. O'n i'n gallu gweld y fflamau o'r adeilad yma.

"'Dwi erioed wedi clywed sŵn fel yna o'r blaen."

'Newyddion torcalonnus'

Mewn neges ar y cyfryngau cymdeithasol yn ymateb i'r cadarnhad bod corff wedi ei ddarganfod yn dilyn y tân, dywedodd AS Pontypridd, Alex Davies-Jones bod yn newyddion yn "dorcalonnus".

"Yn dilyn wythnos wirioneddol anodd i'n cymuned ac ein gwasanaethau brys, mae hyn yn boenus i bawb sy'n rhan ohono, dywedodd.

"Mae fy holl feddyliau gyda theulu ac anwyliaid y dioddefwr."